Page 16 - AM211106

16 AWEMainta .com Diasabra, 06 November 2021

UN SNECHI DI PALABRA DI DIOS

XXXII DIADOMINGO DEN AÑA 07.11.21 #336

I lectura: 1 Rey 17, 10-16
Salmo 146

II lectura: Heb. 9, 24-28
Evangelio: Mc. 12, 38-44

Den e tempo aya, durante su siñansa, Hesus a adverti: “Tene cuidou cu e doctornan di ley cu gusta cana rond
den paña largo y laga hende cuminda nan cu respet na plasa. Tambe nan ta busca e miho luganan pa sinta den
sinagoga y na fiesta nan ta busca e luganan di honor. Nan ta horta propiedad di viuda y nan ta haci oracion largo
dijs pa bista di hende. Ma nan sentencia lo ta mucho mas pisa!” Sinta banda di caha di ofrenda, Hesus tabata mira
con hende tabata tira cen aden. Hopi hende rico tabata tira hopi cen, ma a drenta un viuda pober cu a tira dos
moneda chikito di koper, cu no tabata bal masha. Hesus a yama su discipelnan y bisa nan: “Mi ta sigura boso cu
e viuda pober a tira mas tanto cen den e caha di ofrenda cu tur e otronan, pasobra nan a duna di nan rikesa. Ma
e viuda cu tabata den necesidad, a tira tur loke e tabatin pa e biba di dje.”

Palabra di Señor.

MENSAHE

Sin duda e mensahe di evangelio di awe nos por parti den dos.

- Prome ta un reclamo di Hesus dirigi na doctornan di ley.

- Di dos ta e ofrenda di un viuda pober.
Den prome parti nos ta mira cu esnan cu a haya cierto autoridad y sabiduria, nan ta probecha di nan puesto pa
ricibi honor.

Pio ainda, nan ta probecha nan puesto pa abusa di hende pober. Nan curason ta duru, pero nan ta hunga di
ta importante y santo. Nan bida ta puro engaño di apariencia. Di tur cos nan ta haci un demostracion, haci
oracionnan largo na skina di cayanan den bista di hende y na mesun tempo ta horta hende pober.
E parti aki ta un advertencia pa esnan cu ta masha preocupa cu opinion publico, cu bon apariencia, pero aden ta
yen di indiferencia y malicia.

E historia di e viuda pober ta haci nos drenta den un realidad totalmente diferente y opuesto. Un viuda di gran
fe y curason nobel. Den tur humildad e ta haci un acto di generosidad extremal. E ta duna como ofrenda den
tempel tur cos cu e tin.

Si doctornan di ley a mustra AVARICIA, e viuda pober ta mustra GENEROSIDAD.

Doctornan di ley a busca manera di HAYA (horta), e viuda pober ta busca manera pa DUNA.

Ehempel di e viuda ta siña nos un confiansa sin limite den providencia di Dios. Duna tur cos pa otro, mientras
bo ta den necesidad ta un acto heroico.

Nos ofrenda- y obranan di caridad ta haya balor si nos ta comparti cu otro loke nos tin mester di dje. Comparti
cu otro loke nos tin di sobra, of loke no ta afecta nos bida ta un miseria.Inspira cu ehempel bunita di e viuda di
evangelio di awe ban probecha e tempo aki di pandemia caminda hopi hende ta den necesidad y comparti cu nan
cu un man generoso.

Nos man cera ta expresa nos curason duro.

Nos man habri ta expresa e grado di nos amor pa prohimo y confiansa den Dios.

ORACION

Señor mi ta confia den Bo! Aumenta mi fe!

PROPOSITO
Sea mas generoso cu esnan cu ta den necesidad.