Page 4 - ECOGAS

AWEMainta Dialuna, 17 Augustus 2015 7

E director di EcoGas a splica cu plantanan cu nan a
check tabata traha riba palo so, of carbon so of tire so,
pero no por a haya un planta cu ta traha riba sushi di
cas y sushi comercial cu obviamente tin tur sorto di cos
bruha den otro.
A topa cu un compania na Merca cu ta traha plantanan
chikito, modular, cu por instala banda di otro pa
expande e fabrica y a dicidi di pone tres di e plantanan
aki na Aruba, n’e facilidad di EcoGas na Barcadera. E
planta ta capaz pa procesa 100 ton di sushi pa dia!

Anualmente Aruba tin 100 pa 110 mil ton di sushi cu
por procesa den e planta. Esaki ta exclui sushi manera
santo, piedra, concret, etc. cu ta wordo procesa n’un
otro forma den un otro planta na Barcadera.
“Pa un isla manera Aruba cu 100 mil habitante y un
miyon turista pa aña, esaki t’un cantidad hopi grandi
di desperdicio, pero mester tene semper den mente cu
Aruba ta importa tur cos y no ta fabrica nada cu ta uza
e materialnan importa localmente, Freddy Kelkboom
a bisa.

EcoGas ta traha cu personal tecnico bon entrena, cu
ta inclui algun ex trahado di refineria Valero y ta sigui
train mas personal p’asina cu tempo, ora e momento
yega, nan ta cla pa exporta e experticio pa otro paisnan
y companianan interesa den sigui e pasonan di EcoGas.

EcoGas a “partner up” cu WEB na 2013 pa hunto
reduci importacion di “fuel oil” y combati e problema
di deshaci di sushi riba dump na Parkietenbos.
E compania tin 32 empleado den servicio y ta den fase
final pa procesa su mesun desperdicio, procedente di e
sushi cu Ecotech mes ta recoge na companianan priva
y un mercado chikito di casnan.