Page 34 - AM241002

34 AWEMainta Diaranson, 2 October 2024

Santo di Dia

Nan ta compaña nos den cada paso

Awe ta dia di e Angelnan di Compania

RIBA dia 2 di october, Iglesia Catolico ta celebra e Dia di e Angelnan
di Compania (Angeles de la Guarda), un fiesta dedica n’e sernan
celestial cu, segun tradicion cristian, ta manda pa Dios pa proteha
y guia cada persona a lo largo di su bida. E Angelnan di Compania

ta conoci pa ta un manifestacion di e amor y proteccion divino,
semper presente pero hopi biaha invisibel p’e sernan humano.

E idea di e Angelnan di Compania ta bin di diferente referencia

den Bijbel, caminda ta menciona e angelnan como mensahero y
guardian. Den e Evangelio di Mateo, Hesus ta afirma cu e Angelnan
ta cuida specialmente di esunnan mas chikito, door di señala cu
“su angelnan den shelo ta mira semper e cara di mi Tata” (Mateo

18:10). For di tempo antiguo, ta kere cu cada persona ta bao di
custodia di un angel for di momento di su nacemento encarga pa
vela p’e siguridad spiritual y fisico.

E papel di e Angelnan di Compania no solamente ta limita na
proteha nos di e peligernan visibel, sino tambe di esunnan cu ta
scapa pa nos percepcion. A lo largo di e siglonan, tabatin numeroso
historia cu ta describi con e angelnan ta interveni di manera mila-

groso, salbando bida of guiando e personanan den e momentonan
di crisis of confusion. Nan ta representa como un ayuda constante,
semper cla pa proteha nos, aunke hopi biaha nan presencia no ta
divulga.

E fiesta di dia 2 di october ta invita nos na reflexiona riba e papel
cu e angelnan aki ta fungi den nos bida diario. E ta recorda nos
cu, aunke no semper nos ta wak of nos ta consciente di nan exis-

tencia, e Angelnan di Compania ta compaña nos na tur momento,
ofreciendo nos un guia spiritual y protegiendo nos di e influenci-
anan negativo.

E dia aki tambe ta un recordatorio di e providencia divino. E
Angelnan di Compania no ta interveni cu nos pensamento liber,
pero si ta guia nos y ta orienta nos p’esun bon. Nan ta un presencia
cu ta ofrece nos sosten, proteccion y compania den cada paso cu

nos ta dal den bida, yudando nos pa nos mantene den e caminda
corecto.

Celebrando e dia aki, nos ta invita na gradici y reconoce nos

Angelnan di Compania, kendenan semper ta banda di nos, bogando
pa nos bienestar y siguridad.