Page 32 - MIN JUS 28 JUNE 2017

Pues tin dos consecuencia: 1. Placa no ta bay unda e mester bay 2. E gobernante corupto
ta stroba pueblo di haya locual e ta paga belasting pe, pues no tin placa pa mehora
educacion, cuido medico, seguridad, onderstand etc.
Un inversionista di afo hopi liher lo ripara cu si e paga un funcionario publico placa bao
man e proceso pa establece un negoshi aki ta bay mucho mas rapido.

E funcionario publico cu ta tuma e placa, mientras ya pueblo ta pagando su salario pe
haci su trabao ta haciendo su mes culpabel na corupcion di dia cla.
Corupcion mayoria bes ta sosode concientemente. E ta pasa caminda no tin control y ta
wordo fomenta pa buraconan den ley. Tin ora necesidad di personanan ta conduci na
corupcion.

No pesey e ta bira menos condenabel. E situación, esta cu Aruba ta den gara di corupcion
ta alarmante. El a bira algo asina normal cu mandatarionan ta tribi di saca probecho, ya
cu na Aruba e acto di corupcion ta practica di tur dia, y cu no ta stroba nan den nan
funcion.

Un Minister den funcion cu enbes di entrega su retiro ta sali dilanti, proclama su mes
100% inocente di cargonan serio di parti di instancianan hudicial, e.o. Ministerio Publico,
ta demonstra un falta total di consenshi y di respet pa nos sistema hudicial, según Julie de
Cuba di ReD.

Tambe e ta falta respet pa pueblo votador, pasobra e ta tribi di pidi mi, mi voto y esun di
bo, esey no ta algo totalmente condenabel?

Unda e repudio di pueblo a keda pa un acto cu ta mina autoridad di husticia? Ta husticia
so por declar’e inocente. E tin cu sinta warda riba e uitspraak.

Tur lo demas cu ta ser papia ta “wishful thinking” y ta pa traha riba sentimento di e
Arubiano.
Necesidad tambe ta tera fertil pa corupcion. Si e doño di un snacktruck cu ta traha duro
tur dia di siman pa cria su famia ta ripara cu e por cobra un turista e prijs cu e tin stipula
na florin, na dolar e ta haci’e. Y e ta “get away”, pasobra no tin control y e tin necesidad.
Hasta partidonan politico cu ta cumpra candidatonan pa subi lista cu promesa di duna nan
puesto di Minister of director etc. den un proximo gobernacion ta corupto y punto.
Un candidato politico cu subi un lista, pasobra e partido ta grandi y tin placa, tin den
mente cu esey ta facilita su entrada y progreso riba e arena politico. Sin puntra su mes di
unda e partido ta haya placa y sin evalua kico e partido ta para pe.