Page 8 - Binder1
P. 8
32 AWEMainta Diabierna, 20 Maart 2015
Acto
protocolario
riba Plaza
18 di Maart un bes mas tabata
sublime y a resalta riba tur tereno
DIAMARS atardi e acto protocolario pa rindi honor y respet na
tur cu a lucha ya for di inicio di siglo pasa pa Aruba por a haya su
Status Aparte, a tuma lugar riba Plaza 18 di Maart. Nombernan
di e 2147 firmantenan ta graba den marmer dunando asina e
hombernan Arubiano balente cu den temponan dificil a firma
un peticion cu acompaña pa un mocion a keda entrega na Mesa
Rondo Den Haag dia 18 di maart 1948 pa Shon A Eman, e aprecio
cu nan merece. Nan firma a cambia rumbo di e pais aki.
Despues cu Gobernador di Aruba sr. Fredis Refunjol, Minister,
Parlamentarionan di Aruba, Corsou y Sint Maarten, Fundacion
18 di Maart y demas invitado a tuma asiento, e parti protocolario
a cuminsa.
Maestra di ceremonia Geraldine Muller a pidi tur hende pa lanta
para pa rindi honor y respet na nos bunita Himno canta pa Coro
MaRaKa, bou guia di Iselle Wernet y Johny Scharbaay. Despues
di ofrenda floral na nomber di Gobierno di Aruba y efectua dor
di Prome Minister Eman y Secretaria di Conseho di Minister sra.
Nicole Hoevertsz, a sigui tres ofrenda floral mas, un na nomber
di partido AVP, di Fundacion 18 di Maart y di famia Eman.
Prome Minister Mike Eman a hiba un bunita discurso den cual el
a pone hopi atencion na tur esnan cu a haci posibel cu awe Aruba
ta ‘Baas den su mes cas”.
Un lucha largo cu a inicia na cuminsamento di siglo pasa y a
culmina den nos tan anhela Status Aparte na 1986.
Sra. Mary Wever-Lacle di Fundacion 18 di Maart a haci uzo di e
oportunidad pa mustra su preocupacion pa loke ta pasando riba
nos rednan social, unda e libertad di expresion ta wordo usa pa
ofende otro den forma mahos. Un derecho cu nos tin, pero cu ta
bayendo den un direccion completamente robez.
E hobencita Besselink a canta su cancion, mientras su bailarinanan
a duna un bunita show.
Despues di e discurso di Prome Minister a canta Himno di Aruba
un bes mas pa clausura e parti protocolario. A sigui un recepcion
chikito unda esnan presente a combersa cu otro den forma
ameno. E coro a sigui deleita e publico cu canticanan di antes na
Hulandes y Papiamento. Esaki tabata un sorpesa agradabel.
Prome Minister a guia sra. Tanja Timmermans y Henk Drost,
respectivamente representante interino di Hulanda na Aruba
(VNO) y representante nobo di Hulanda na Corsou, riba e Plaza.
Nan a haya un splicacion completo di Prome Minister di e lucha
cu a wordo hiba na Aruba p’e logra su Status Aparte.
E comision organisado a haci un trabou sublime. Nan por mira
bek riba un atardi exitoso. Aparte di e ceremonia na Plaza 18 di
Maart, e comision a organisa tambe e anochi cultural riba Plaza
Libertador Betico Croes y e ceremonia dilanti di Bestuurskantoor.
