Page 3 - AM211110

Diaranson, 10 November 2021 AWEMainta.com 3

Cambio na prison exigi pa TOPA

Partido MEP a tuma direccion di

un pais completamente rehen

Esunnan cu ta insinua cu partido MEP no tin vision politico, tin cu guli nan
palabranan, ya cu den cuestion di un siman, lidernan di MEP a tuma cierto decision
cu ta pone direccion di henter e pais, den man di e partido geel por completo.
Siman a bira conoci cu e ciudadano Ton Rojer lo bira e Director nobo di Utilities
NV, un ex politico cu tabata riba lista di MEP y kende tabata campañado formal
di Prome Minister Evelyn Wever Croes.

Den fin di siman tambe a bira conoci cu Gobierno di MEP, lo firma pa entrada di e
compania Eagle LNG den compania di awa y electridad, esta WEB Aruba NV cu
tambe ta otro asunto cuestionabel, mirando cu e compania aki a firma un “Letter of
Exclusivity” cu Gobierno pa percura y sigura reapertura di e refineria na San Nicolas.

Gobierno demisionario cu Prome Minister lider di MEP na cabes, ta nombra Lati
Wever como Director interino, kende ta swa di Evelyn Wever Croes, pues otro
compania di pueblo bou direccion di un hende di MEP.
Ayera ta drenta informacion cu sindicato TOPA lo a yega na palabracion cu
Gobierno di MEP ya cu ainda e dos Ministernan di partido RAIZ no tin base legal
pa actua, pues tur cos ta den man di e Ministernan di MEP of e lider di MEP.
Den su carta dirigi na Minister di Husticia Rocco Tjon, TOPA kier mira salida
di e Director di KIA, Gino Winklaar y na lugar di e director aki, nombra otro
“Management Team” pa atende cu KIA ya cu p’e sindicato, ta algo hopi serio
pasando na KIA.
Nada di haber cu huida di presonan, mal trato di presonan of algo mas serio, pero
TOPA kier cambio ya cu e Director no sa con pa atende cu e “plaatsingprocedure”,
pues na Papiamento, promocionnan den e instituto coreccional.

Loke ta haci desaroyo di KIA mas interesante t’e hecho cu TOPA kier mira un
Management Team forma pa Louis Croes kende ta campañado grandi di partido
MEP, tambe Sarlyn Tromp-Ruiz, kende ta bin resulta di ta campañado di tanto
MEP como di e propio Minister di Husticia, Rocco Tjon.E di tres miembro di e
ekipo aki cu TOPA kier pa dirigi KIA, lo ta Cedric Rodriguez, kende ta resulta di
ta un primo di Comisario di Polis Vanessa Kock-Tjon, esposa di Minister Rocco
Tjon.

Si ningun hende kier reconoce cu e tipo di desaroyonan aki ta loke gobernacion
cu integridad “what’s it’s all about” anto e hendenan aki ta di mala fe, ya cu ta
tipo di decisionnan cu ta basa riba e mentalidad integro di e Gobierno y di su
mandatarionan.
Gabinete Wever Croes ta bayendo den historia politico di pais Aruba como e
Gobiernonan di MEP cu mas “management team” a yega di nombra durante di
nan periodo di gobernacion, ya cu ainda tin varios di e ekiponan aki actuando riba
ordonan di Gobierno.
Sinembargo e tipo di decisionnan aki ta bolbe confirma cu gabinete Wever Croes
ta bisa algo y ta haci net lo contrario, algo cu no ta straño ya cu for di 2017 e tipo di
desaroyopnan aki a domina e maneho di e Gobiernonan di MEP caminda interes
partidista, interes di politiconan di e partido, ta riba interes general di pueblo.

Aki por mira cu Gobierno di MEP no ta respeta nan propio decision, ya cu Gino
Winklaar a keda nombra pa Gabinete Evelyn Wever Croes I, esta dor di Minister
di Husticia Andin Bikker, pero awe, pasobra Rocco Tjon a haci un cantidad di
promesa, mester corta e.o. su cabez. Y loke ta keda confirma tambe, cu sindicato
TOPA tin masha poder riba e Gobierno aki. Esaki por bira un peliger p’e propio
Gobierno aki, cu manera e ta mustra no tin mucho bida mas.