Page 45 - MIN ARENDS

Cuater miyon awor ta bay pa 92 ex

empleado di Setar

Posted on 06/29/2017 7:37 pm AST | Updated on 06/29/2017 11:22 pm AST

ORANJESTAD - Gobierno a haya autorisacion di Parlamento e siman aki pa
paga 92 ex trahado di Setar, e suma di 4 miyon florin. Diaranson Parlamento di
Aruba a aproba e ley cu ta autorisa Minister di Asuntonan Economico pa haci
un pago na ex-empleadonan di servicio di Telecomunicacion di Aruba SETAR,
prome cu el a bira un NV. Minister Arends a splica con esaki a cana. "Na 2003 a
surgi un disputa despues di a firma a statuto social di e privatisacion di SETAR.
Tabatin un discrepancia den e definicion kico ta e base pa e afvloeiingsregeling."
Minister Arends a bisa cu e discrepancia aki a causa cu a start un procedura
legal cu a dura 14 aña. Un eternidad y sin duda un asunto tristo si tene na cuenta
cu aki ta papia di hende grandi caba. "For di 2003 cu e asunto aki a start, e
gobierno di e tempo ey a obstaculisa e caso aki, sin tabata necesario."

Arends: "Na 2015 hues specificamente a dicta na fabor di 32 empleado. E demas 60
empleado no a haya un sentencia di hues. Aña pasa Minister de Meza hunto cu Prome
Minister Mike Eman y sindicato SEPPA a yega na un acuerdo di principio unda ta
trata tur empleado di e mes manera. A traha diligentemente riba un ley unda ta pidi
autorisacion na Parlamento pa por efectua e pago aki di mas di 4 miyon florin na e 92
trahadonan."