Page 24 - awe1806_merged

Diasabra 18 di Juni 2022

FORTALEZA PA FAMIA
Scirbi pa Pastor Marcel Balootje.

DIOS TA EXIGI SERIEDAD Y FIELDAD DI TUR TATA.

Proverbionan capitulo 14 vers 26 ta bisa : Den e temor di Señor tin confiansa fuerte, y su yuinan lo tin un
luga di refugio. Como tata abo ta e prome maestro di yiu, pasobra abo como tata mester instrui e mucha den
caminda, cu e mester cana pa nan grandi e no aparta for di dje. Traha yiu cu bo no por cria, of traha yiu pa loco
cu varios muhe, ya no ta cos di broma mas sino ta cos di berguensa, pasobra cada mucha cu lanta sin tata , ta
un problema pa su mes y sociedad. No bandona bo yiunan y spera cu e proximo homber cu e mama topa , si
lo trata nan bon, pasobra como tata bo ta yama pa mantene bo matrimonio. ( Mateo 19:6).

Bo ta yama pa ta un bon esposo. Abo ta esun cu mester trece palabra di Dios den bo Hogar. Trece bo famia
na Señor. Bo mester tin temor di Dios, encurasha bo yiunan pa biba pa Cristo, no provoca bo yuinan, lanta bo
yuinan den respet, pone tempo pa bo yuinan. Un tata ta haci oracion pa su yiu y ta siña su yiu haci oracion,
pasobra esey ta locual Dios ta bisa pa cada tata haci (1 Cronicas 29:19). Un tata no por entrega su famia, ni
tampoco entrega su yiunan, no permiti den ningun sentido pa satanas kita bo yui for di bo( Lucas capitulo 15
vers 20-24), bo mester lucha pa bienestar di bo hogar. Tata nunca ta perde speransa, mas su confiansa ta den
Dios Todopoderoso, y e mesun confiansa e ta pasa over pa su yuinan.

Un bon tata ta displina su yuinan, cual ta su deber , y tambe ora e mester pidi despensa na su yuinan e ta
hacie sin ningun clase di excuus, pasobra den esey e ta mustra e gran amor cu tur tata mester tin. Un tata
mester tin compasion di su yuinan, mescos cu Dios tin di dje, pasobra duresa di curazon, ta causa herida, y
falta di amor di tata, ta pone mucha trompica. Pone bo placa caminda bo boca ta, cria bo yuinan pasobra nan
ta bo simia,pasobra un homber cu no ta cria su yuinan a ninga Fe y ta pio cu un incredulo of hende cu no
conoce Dios.( 1 Timoteo 5 vers 8). (Santiago capitulo 1 vers 22)

Ta difisil pa un tata ta provoca su yuinan, lansando ofensa constant den nan direccion, pasobra esey no
ta bin di Dios, no por ta posibel un tata ta instiga su yiu na violencia ( Efeisios 6 ;4). Tata ta encurasha su
yuinan tur dia pa nan biba pa Cristo y cana den un manera digno cu Dios. Aunque tempo a bira moderno, bo
atencion como tata no por bira moderno, tene contacto cu bo yuinan personalmente, y no telefonicamente,
tampoco via di internet, un mensahe no ta iguala na bo presencia, abo mes mester tey , pa bo mira, y tuma bo
responsabilidad, material nunca por surpasa amor di tata . Bo presensia ta cubri tur sorto di dolor, pasobra bo
presencia ta nifica , cu bo ta cu bo yiu, y e ta mira amor y proteccion den bo, pesey ta haci dolor pa un mucha
ora su tata mester bandonan cas.

Un tata cu ta bandona su cas pa bon bida, ta mescos cu un para cu ta bandona su neishi y laga su yiunan den
peliger, cu bestia feroz por come nan.Tata sea consciente, Fiel, y Serio.

Sinceramente, Pastor Marcel Balootje.

24