Page 25 - awe1806_merged

Diasabra 18 di Juni 2022

UN SNECHI DI PALABRA DI DIOS

DIADOMINGO DI CORPUS CRISTI 19.06.22 #368

DIA DI TATA
I lectura: Gen 14,18-20 Salmo: 110 II lectra: 1 Cor 11, 23-26
Evangelio: Lc 9, 11-17
Den e tempo aya Hesus a papia cu hende tocante reino di Dios. Tambe El a cura esnan
cu tabatin necesidad di cura. Ora solo a cuminsa baha, e diesdos discipelnan a bay
cerca Hesus y a bis’E: “Manda e multitud bay, ya nan por bay e pueblo y pueblesitonan den bisindario pa
nan haya luga di drumi y cuminda pa come. Pasobra aki nos ta na un luga solitario.” Hesus a contesta:
“Boso mes duna nan di come, no!” Nan di: “Nos no tin mas cu cinco pan y dos pisca. Acaso Bo kier pa nos
bay cumpra cuminda pa tur e hendenan aki?” Ta asina cu tabatin mas o menos cinco mil homber ey. Hesus
a bisa su discipelnan: “Pone tur hende sinta den grupo di mas o menos cincuenta.” Nan a obedece y pone
tur hende sinta. Hesus a tuma e cinco pannan y e dos piscanan; El a hisa su cara na shelo y gradici Dios.
El a kibra e pannan y duna su discipelnan pa nan parti pa e hendenan. Tur hende a come suficiente y e
discipelnan a yena diesdos macuto cu loke a sobra.

Palabra di Señor.

MENSAHE
Awe Iglesia ta celebra e fiesta di “Corpus Cristi” – Curpa y Sanger di Hesus. E ta un recuerdo di institucion
di Eucaristia, como tambe e ta yama nos atencion riba balor y importancia di e sacramento aki. Ta berdad
cu Diahuebs Santo nos ta pone atencion riba e echo aki, pero como Triduo Pascual ta pone mas enfasis
riba sufrimento, morto y resureccion di Hesus, Iglesia ta haya oportuno pa dedica un dia special pa
contempla e misterio di e sacramento aki.
Evangelio di awe ta conta nos un di e historianan di multiplicacion di pan. Un multitud Hudiu a reuni
pa scucha Hesus. Nan ta keda asina cautiva cu su mensahe cu nan ta descuida sentimento di
hamber. Pero Hesus ta consciente di tur nan necesidadnan. E ta ofrece nan pan pa sacia e hamber
di nan curpa y su mes persona como pan cu ta sacia e hamber di nan alma. Precisamente e pan
aki nos por ricibi pa medio di cada eucaristia. Hesus ta e pan cu ta duna bida eterno. P’esey nos
no por trata Misa como un alternativa spiritual, sino un necesidad pa ricibi eucaristia di un forma
digno y regular.
Hesus ta haci un milager, pero E ta pidi nos cooperacion. Den historia di awe el a haya cooperacion
di 5 pan y 2 pisca.
Despues E ta encarga su discipelnan pa nan parti e pan. Di igual manera Hesus ta pidi cada un
di nos pa nos pone nos parti di cooperacion y finalmente yud’E den distribucion husto di alimento:
“Boso mes duna nan di come”.
Awe celebrando dia di tata mi kier dirigi na tur tata cu ta responsabel pa alimenta y educa nan
yiunan. Duna boso yiunan di come – loke ta saludabel pa nan curpa, pero yuda nan tambe yega na
mesa di eucaristia pa nan por haya alimento spiritual. Alimento di cua ta depende eternidad di nos
muchanan, hobennan y nos tur.

ORACION

Alaba sea Hesus den Santisimo Sacramento di Eucaristia
PROPOSITO

Pone mas atencion den preparacion pa participa den Santa Misa y Santa Comunion.

25