Page 24 - AWEMAINTA

24 AWEMainta Diasabra, 1 Februari 2020

UN SNECHI DI PALABRA DI DIOS

IV DIADOMINGO DEN AÑA;
PRESENTACION DI HESUS DEN TEMPEL 2 di februari 2020

1 lect.: Mal 3, 1-4
Salmo: 24
2 lect.: Heb 2, 14-18
Evangelio: Lc 2, 22-40 of Lc 2, 22-32

Tempo a yega, cu Hose y Maria tabatin di cumpli cu e ceremonianan di purificacion di
Mama, manera ley di Moises ta prescribi. P‟esey, nan a hiba Hesus Herusalem pa
ofrec‟E na Señor. Esaki tabata cuadra cu loke ley di Señor ta bisa: “Tur prome yiu
homber mester ta dedica na Señor.” Tambe nan a bay ofrece un sacrificio di
purificacion cu segun ley di Moises, ta „dos tortelduif of dos pichon‟. Den e tempo ey,
un cierto homber, yama Simeon, ta biba na Herusalem. E tabata un hende husto y
devoto, cu tabata warda riba esun yama „Consuelo di Israel‟. Spirito Santo tabata
cune. Spirito Santo a revel‟e cu lo e no muri prome cu e mira e Mesias, cu Señor a
priminti. Guia pa Spirito Santo, el a drenta tempel. Ora e mayornan di e Yiu di Hesus a
drenta tempel cun‟E pa nan haci loke ley ta exigi den conexion cu su nacemento,
Simeon a tuma e Yiu den su brasa y a alaba Dios bisando: “Awor bo por laga bo cria
bay na paz, Señor, di acuerdo cu bo promesa. Pasobra cu mi mes wowo mi a mira e
salbacion, cu Bo a prepara den bista di tur pueblo; e luz cu lo trece revelacion pa
paganonan, y Gloria di Israel, bo pueblo.” Mayornan di Hesus a keda asombra di
tende loke Simeon a bisa tocante di e yiu. Simeon a bendiciona nan y a bisa Maria, su
mama. “E mucha aki ta destina pa pone hopi hende na Israel cay y hopi otro lanta. Lo
E sirbi como un señal controversial. Pa asin‟ey pensamento di hopi hende sali na cla.
Y abo lo sufri dolor como si fuera un spada ta transpasa bo curason”.
Palabra di Señor!

MENSAHE

Bida di cada ser humano ta keda relaciona cu cruz. Hesus
mes a bisa: “Si un hende kier sigui mi e mester lubida su mes,
hisa su cruz y sigui Mi.” (Mt 16,24). Sin duda e cruz aki ta hiba
nos pa gloria en cuanto nos ta keda fiel na Dios, pero ora e ta
presenta poco biaha nos ta pensa riba esey. Mas tanto nos ta
concentra riba sufrimento. Maria a keda yama pa bira mama
di Salbador. Un yamada sublime cu lo marca henter su bida.
Pero tambe fo‟i prome instante e ta haya e mensahe cu su
curason lo keda transpasa cu un spada. Esey ta e anuncio cu
bida di Maria lo keda marca cu un cruz. E cruz aki (spada)
tabata relaciona cu bida y vocacion di su yiu. Di igual manera
bida di tur mayor responsabel ta keda marca cu un cruz cu ta keda relaciona cu bida
di nan yiunan. Sin duda e ta refleha su mes den e sacrificio di cria y educa un yiu,
pero tambe cu e echo cu algun dia e yiu lo tuma su propio caminda. Ta algo natural
cu mayornan tin nan plannan y deseonan cu nan yiunan, pero no semper bida di nan
yiunan ta bay segun e plan aki. E ora ey nan curason ta keda transpasa cu un spada.
Ban resa pa tur mayor cu ta sufri pa motibo di nan yiunan. Sea cu nan ta participa den
nan fracasonan, sea nan ta sufri soledad, pasobra e yiu a sali fo‟i cas y a cuminsa su
bida pa cua Dios a yam‟e. Mara tur mayor sa respeta e vocacion di nan yiunan y en
particular ora yiu ta haya yamada pa bira sacerdote of religioso(a).

ORACION

Señor! Yuda mi guia mi yiunan segun Bo santa boluntad.

PROPOSITO

Revisa bo relacion cu bo yiu(nnan) y renoba compromiso di
pone mas atencion riba nan bida spiritual.