Page 7 - DESPA

diferente plan mundial y acuerdonan, entre otro ‘Plan di Acion Internacional di Madrid’ tocante
envehecimento, cu ta enfoca riba diferente strategia con pa atende cu envehecimento y biehes, unda
‘derechonan di anciano’ ta hunga un rol central. Nos poblacion ta experiencia un envehecimento
creciente. Envehecimento y biehes ta un proceso cu ta concerni nos tur como ciudadano. P’esey ta
necesario pa bin cu un maneho nacional cu ta enfoca riba construi un comunidad y sociedad unda
bienestar di hende di tur edad ta un reto politico y un responsibilidad di gobierno. Tanten cu e imagen
negativo di biehes continua y comunidad keda asocia envehecimento cu deterioro y incapacidad, nos lo
no ta capas pa disfruta y experiencia opcionan pa biba dignamente den e etapa aki di nos bida. Nos tur
merece di biba y experiencia protecion di nos derechonan: desdei nos cuna te na e ultimo etapa di nos
bida, sin hustificacion falso y sin discriminacion entre generacionnan. Esaki ta un di e exigencianan cu ta
sobresalta den tur documento produci te awor pa entre otro Nacionnan Uni, WHO, PAHO, etc. den
cuadro internacional di proteccion di derechonan humano incluso esnan ariba di 60 aña di edad. Un Plan
Nacional pa Aruba, basa riba por ehempel esnan ya menciona di WHO y Nacionnan Uni y otronan, ta un
oportunidad grandi pa gobierno di Aruba implementa un maneho nacional y structural den cua e
derechonan, cuido y bienestar di nos grandinan ta haya e atencion completo y adecuado. Awo ta keda na
e boluntad di cada gobierno pa implementa e resolucionnan aki den practica den nan respectivo pais.