Page 17 - AM211113

Diasabra, 13 November 2021 AWEMainta.com 17

UN SNECHI DI PALABRA DI DIOS

XXXIII DIADOMINGO DEN AÑA 14.11.21 #337

I lect: Dan. 12, 1-3
Salmo 16
II lect: Heb. 10, 11-14.18
Evangelio: Mc. 13, 24-32

Den e tempo aya Hesus a bisa su discipelnan: “E dianan ey, despues di gran miseria, scuridad lo tapa solo, y luna lo no
briya mas, streanan lo cay for di shelo y podernan celestial lo sacudi. E ora ey lo mira Yiu di hende bini riba nubia, cu gran
poder y gloria. Lo E manda angel reuni su escogidonan for di e cuater skinanan di mundo, for di un extremo di mundo te e
otro extremo. Siña lo siguiente di e palo di figo. Ora su takinan bira moli y su blachinan cuminsa spreit, boso sa cu zomer
ta na caminda. Sa anto tambe, cu ora e cosnan aki ta pasando, cu e ta dijs tras di porta. Mi ta sigura boso: e cosnan lo
pasa prome cu e generacion pasa bay. Shelo y tera lo pasa bay, ma mi palabranan si lo no pasa bay! Ningun hende no
sa ki dia ta e dia of ki ora ta e ora, ni angel den shelo ni e Yiu di hende no sa; Dios Tata so sa esey.”

Palabra di Señor.

MENSAHE
Tur aña culminando aña liturgico nos ta haya lecturanan cu ta papia di fin di mundo. Tur generacion ta
tende e mesun mensahe biblico cu e final lo keda anticipa cu cosnan spantoso: guera, cataclismonan
natural, scuridad, streanan lo cay fo’i shelo, etc. Ora hende ta mira e señalnan aki nan ta spanta, pero
como mundo no a caba, nan ta cuminsa ignora nan. Di otro banda hopi hende, den esey diferente lider spiritual, a intenta
pone fecha precies pa fin di mundo. Esey tampoco a sosede. P’esey hopi hende ta biba despreocupa comosifuera fin
nunca lo yega.
Kisas nos generacion lo no experencia e fin di mundo, pero cada un di nos sin ningun excepcion lo experencia nos final
terenal.

Ora bo bida ta cabando ta manera mundo ta caba. Bo
mundo ta caba. E momento di morto ta sacudi tur cos cu
ta rond di bo. Finalmente ta bin scuridad – bo wowonan lo
no mira luz di solo of streanan nunca mas. Den e sentido
aki nos mester interpreta e palabranan apocaliptico cu nos
a haya den evangelio di awe. Cada epoca y generacion
ta haya su señalnan di fin. Nos por haya señalnan simpel
manera nos debilidad, enfermedad, edad cu ta anuncia cu
final ta cerca. Nos mester sa interpreta e señalnan aki. Nos
mester comprende cu e cosnan aki ta e señal cu morto ta
djis tras di porta.

E señalnan aki no ta pa nos haya miedo, sino ta un gracia
di Dios cu ta yuda nos prepara pa un bon morto. Anto bon
morto ta ora nos ta den gracia di Dios – sin pica mortal.
P’esey e señalnan cu ta anuncia nos final ta un ALARMA
pa no perde niun rato, sino busca manera pa reconcilia
cu Dios y cu tur hende. Bon preparacion pa morto ta ora
nos a haci confesion sacramental (preferibel di henter nos
bida) ricibi Santo Oleo y Santa Comunion. Fecha precies di
nos partida ta conoci solamente pa Dios. P’esey tambe un
yamada constante di Hesus, pa semper nos sea prepara
cu lomba faha y nos lampi cendi. Si un hende ta prepara
pa morto e lo bira un experiencia bunita di paso pa un otro
realidad – celestial. Den caso cu un persona no ta prepara,
morto por provoca hopi miedo y teror.

ORACION
Di un morto repentino, libra nos Señor!

PROPOSITO
Samina bo consenshi regular, pa keda
semper prepara pa morto y huicio final.