Page 22 - KPA 15 DEC 2015

Djamars 15 Desèmber 2015 3

DAMA MORTO
GATU A KEDA

ASESINA

WILLEMSTAD.-
Kontinuando ku
investigashon di e kaso di
e hende muhé ku a haña
morto den un kas na Gatu,
djadumingu anochi, polis a
duna di konosé ku ta trata di
un kaso di asesinato.

Den e informashon
preliminar ku a risibí,
serka bosero polisial sr.
Imro Zwerwer despues di e
suseso, no por a bisa sigur
ku ta un kaso di asesinato.

Tabata alrededor di
kuartu pasa di nuebe (9:15)
ku Sentral di Polis a risibí
informashon ku na un kas
na Gatu tin un dama drumí
den un plas di sanger i no ta
reakshoná.

E patruya ku a bai na
e sitio a haña e dama den
e kondishon menshoná
anteriormente i ku un hinká
na su pechu i a konstatá ku
e víktima no ta duna señal
di bida. E víktima a keda
identifiká komo Luz Elena
Rodriguez Rivas, nasé na
Colombia di 30 aña di edat.
A resultá ku e víktima no
ta habitante di e kas i pa e
motibu ei ainda no ta muchu
kla kiko e tabata hasiendo
na e kas. Komo parti di e
investigashon polis a detené
G.R.T., nasé na Colombia,
di 52 aña di edat kual ta e
hòmber habitante di e kas.
Na momento ku a trata di
kombersá ku e habitante
pa determiná eksaktamente
kiko a sosodé, e tabata den
un estado hopi konfuso i
no por a splika polisnan
nada di lokual a pasa na
e kas. A detené e hòmber
aki i bai warda kuné na
unda a present’é dilanti
di un fiskal ouksiliar ku a
ordená su enkarselamentu
pa mas investigashon.
Segun informashon ku
EXTRA a risibí, durante di
interogashon e hòmber a
indiká ku e no sa mes ta
kiko a pasa. Komo parti di e
investigashon, riba òrdu di
fiskal di Ministerio Públiko
a konfiská e kurpa.