Page 34 - MIN ECEM

E sala di exposicion di Museo Arqueologico for di luna di maart di e aña aki, manera ta
conoci, ta sera pa publico en conexion cu trabounan di mantencion di cual e parti cu ta
tumando mas tempo, t’e trabounan di desmantelacion y instalacion di ful un sistema nobo
di airco pa henter e compleho.

Pa haci esaki posibel y pa percura cu niun material arqueologico ta haya daño a causa di e
calor, ni durante e trabounan cu mester ser haci, a saca algun obheto for di e sala di
exposicion permanente.

Ademas p’e compania di instalacion di e sistema di airco por haci su trabou debidamente,
mester desmantela cierto area den e sala di exposicion pa un otro compania cu experticio
den esaki. Manera ta di compronde, esaki tambe ta tuma su tempo, pasobra e mester ser
haci na un manera responsabel.

Mientrastanto cu e trabounan aki ta tumando lugar n’e compleho di MANA, ta sigui
brinda publico e servicio di duna informacion tocante nos antepasadonan.

Studiante y alumno di scol cu mester traha un werkstuk, raport of spreekbeurt pa scol
semper por acudi na oficinanan di MANA pa haya e informacion necesario.

Ademas MANA ta forma parti di e exposicion temporario na Archivo Nacional Aruba,
como tambe tin un exhibicion temporario 3D den cuadro di ‘Museum goes Tec’ na
Biblioteca Nacional Aruba pa tur bishitante di e centro educativo aki.

Banda di esaki ta ofrece charla cu diferente tema na diferente localidad y e biaha aki ta
trece e Museo na MFA Paradera.

Pues un y tur cu ta interesa den historia di nos antepasadonan y en specifico den nos
arqueologia marino, y cu no a haya e oportunidad biaha pasa, ta keda cordialmente invita
pa bin MFA Paradera, diaranzon anochi pa 7’or, pa asina haya sa mas tocante e naufragio
cu a tuma lugar na aña 1886 a causa di un Horcan y e restonan di skelet di un tripulante
cu a ser descubri despues di Horcan Dean na 2007.

Asina Museo Arqueologico ta keda brinda e servicio na publico pa informa tur interesado
tocante nos herencia cultural arkeologico.