Page 40 - MIN VOS

Pa añanan mi tabatin e oportunidad pa organisa programanan den bario y despues di scol
na unda un cantidad grandi di hobennan tabata tuma parti y asina kitanan for di caya y
disciplina nan den un deporte of movecion general. Esaki mi lo kier mira bek. Mi lo kier
desaroya di nobo e programanan aki uzando nos mesun profesionalnan cu a bin ta
preparando nan mes aki na Aruba y otro partinan, manera Hulanda, van Putten ta splica.

Segun van Putten, Deporte mester ta acesibel pa tur hende no importa nan situacion
financiero of nan status social. Gobierno su tarea den esaki mester ta primordial. Mester
inverti den manehonan, nos personal y instructornan cu lo atende den e barionan
traimerdia.

Un maneho integral na unda ta promove y envolvi tur nos hubentud tanto den e
facilidadnan cu tin y esnan cu lo bin. Mester percura cu tin fondo pa drechanan y haci nan
funcional.

Salud no ta estudionan y colecta data mientras nos sa kico e solucion ta.

Drentando nos barionan bek cu deporte y movecion lo motiva nos hobennan pa scohe e
bon caminda. Lo alivia e mayornan mirando cu deporte ta acesible pa nan yiunan y lo
kitanan for di caya. Mi compromiso ta kita maneho di deporte for di AO y hacie
funcional atrobe.

Mi tata, van Putten ta conta, semper a bisami e pio cartera pa scohe den politica ta
deporte, e no ta genera voto, pero e miho satisfaccion si ta e felicidad di nos hobennan
ora bo mira nan logra den nan bida loke bo kier mira den nan!

Pa mi deporte ta un bida y no un campaña politico, no un “mira kico mi ta dunabo”.

Deporte ta un sanacion di un comunidad, e ta e ader di salud. P’esey mi compromiso ta e
maneho transparente den deporte na unda tur ciudadano, grandi y chikito lo wordo brinda
e mesun oportunidad di practica nan deporte den nan bario y facilidadnan adecua na un
costo pagabel y percura pa guia profesional pa tur, van Putten ta termina bisando.