Page 31 - ATA JUNE 30 2015

Tur e artistanan aki a haci promocion pa Aruba caba, sea ta cu video, potret of mensahe cu nan a
publica. Y cada un di e publicacionnan aki ta alcansa miyones di hende, directamente den nan
celular of nan computer na trabao.

Separa di e cobertura pa nos isla, ta asina cu e artistanan di Aruba mes tambe a haya masha
promocion, via entrevista y cobertura na canalnan di television specialmente Latino Americano.
Esey a sosode durante e evento tambe, ora cu a entrevista entre otro NutzBeatz, pero esaki a
sosode durante di un recepcion diabierna atardi unda ATA a invita prensa internacional pa cera
conoci cu talento nan local cu a presenta durante e prome anochi, esta diahuebs. Hopi entrevista
a tuma luga aki y A.T.A. ta gradici e diferente di nos artista nan pa nan presencia.

“Nos a combersa cu hopi medionan di comunicacion, cu no a bin solamente pa e artistanan pero
tambe pa duna cobertura na nos isla. E turistanan cu a bin pa e concierto tambe a shop, tambe a
bishita otro atraccionnan y cu e speranza cu nan lo regresa despues cu henter nan famia y
amigonan. Esey ta un parti tambe di e vision tras di e eventonan aki, fuera di duna un impulso pa
medio di fluho di bishitante y pa medio di cobertura amplio”, asina e ehecutivo di Aruba
Tourism Authority a termina bisando.

E evento a tuma luga diahuebs na Entertainment Center, y diabierna y diasabra anochi riba
tereno di waf y a conta cu algun mil hende riba cada un di e anochinan y a conta cu presentacion
di Jerry Rivera, Elvis Crespo, Carlos Vives, Nicky Jam, NutzBeatz y Pitbull. E evento a duna
cada un di nos e oportunidad unico pa por a “Duna Aruba e miho di Nos”, cu tur e artistanan,
medionan di comunicacion y turistanan presente.

A.T.A. ta felicita Loco Lobo Productions, SD Concerts y tur otro sponsor, compania nan,
organizacion nan cu a “Duna e miho di nan” den fin di siman cu a pasa pa asina tur cos por cana
na ordo. Tambe e C.E.O ta gradici Minister di Turismo, Hunta di Supervision di A.T.A. y e
ekipo di A.T.A. pa e tremendo cooperacion y aporte. Principalmente e ekipo di A.T.A. cu a traha
incansablemente pa haci di e prome edicion aki un exito. A.T.A. lo evalua e evento debidamente,
conforma palabracion nan haci y tambe lo trece diferente punto dilanti di mehoracion/ahustacion.
No obstante A.T.A. ta felicita y gradici pa un evento exitoso pa Aruba.

http://www.diario.aw/2015/06/aruba-summer-music-festival-un-exito/