Page 10 - HOH

Aruba ta den tropico y e hendenan mester

protege nan mes di e solo pa evita cancer di

cuero

 Local

- 02/03/2018

Dia 4 di Februari tabata dia mundial di Cancer y pa e motibo aki cu Departamento di
Salud Publico, hunto cu diferente partner y profesional, a papia riba diferente malesa
di Cancer den e luna cu ta tras di lomba. Entre otro a papia di e malesa di Cancer di
Pecho, Cancer di tripa, Cancer na boca di matris y mas ultimo a enfoca riba e Cancer
cu ta predonima na Aruba, den loke ta diagnostico, esta Cancer di Cuero.

Loke a bini dilanti den e informacionnan suministra ta cu tin basta caso di cancer di
cuero na Aruba. Hopi hende lo no por kere pero tin un averahe di mas cu 100 caso cu
ta wordo diagnostica anualmente. Ta pesey ta hopi importante pa trece e informacion
na comunidad, con pa proteha nan mes y na ki momento tin cu bay dokter, ora cu ta
mira cambionan riba e cuero.

Aruba ta den un area tropical, unda cu tin hopi solo y mas cu claro esaki ta haci
influencia riba e cuero, y pa cual ta necesario protege esaki.

Cancer di Cuero ta mas prevalente na Aruba. Ta importante pa nos sa kico pa haci pa
preveni. Tambe ta importante pa nos sa ki ora pa acudi na dokter. Cancer di cuero cu
ta maligno, por parti nan den dos grupo. E non-melanoma skin cancers. Esta e
cancernan cu no ta melanoma y bo tin tambe e cancernan cu nos ta yama melanoma.

NON-MELANOMA

Ora cu ta papia di non-melanoma skin cancers, ta papia di dos tipo di cancer di cuero,
cu ta e basaliomanan y e spinocelulaire carninomen. Tur dos tipo ta cancer di cuero cu
e factor di riesgo ta rayonan ultra violeta di solo. En berdad nos ta biba den un area
tropical di mundo, unda cu solo ta cay directamente riba e superficie y tambe riba nos
cuero. E ora eynan ta hopi importante pa proteha nos cuero contra e rayonan Ultra
violeta cu ta bin di e solo. Vooral di e cuero ta un cuero cu no tin hopi pigment. Hende
cu ta di color mas cla, cu tin menos pigment, e ta mas na riesgo. Un hende cu tin mas
pigment, un hende mas scur ta un tiki mas protehi. E pigment den nos cuero ta
eigenlijk fungi manera un parasol cu ta proteha nos contra e rayonan aki di solo.