Page 31 - AHATA

ATA satisfecho cu encuentro cu

operadornan turistico di latinoamerica

Posted on 05/15/2018 6:51 pm AST | Updated on 05/15/2018 6:52 pm AST

ORANJESTAD— Aruba Tourism Authority (A.T.A.) tabata anfitrion di un grupo di
operador di biahe for di Latino America den cuadro di e conferencia LAPMA 2018 y ta
satisfecho cu e encuentro. E tipo di encuentronan aki ta forma parti di A.T.A. su vision y
plan di maneho pa sigui diversifica nos mercado y acentua e autenticidad di nos producto
Aruba. Segun ATA, e participantenan a keda masha impresiona cu e avancenan cu Aruba
a conoce na nivel di infrastructura y mercadeo, y tambe ta entusiasma pa loke tin planea
den futuro, riba termino corto, mediano y largo.

Pa realisacion di e programa cu a inclui bishita na hotelnan, presentacionnan informativo
y tambe sesionnan ‘Business 2 Business’, A.T.A. a conta cu cooperacion di varios socio
den e sector turistico. Operadornan di Latino America por a experiencia un poco di nos
cultura, arte y historia Arubiano y asina tin un variedad di opcion pa mercadea nos isla
como destinacion di reunion cu nan clientenan potencial.

Turismo procedente for di e continente Latino America a trece te cu april 2018, 43.554
bishitante pa nos destinacion, cu ta 12% di e total di turismo pa Aruba (marketshare).
Atrabes di encuentronan manera LAPMA y ATCA cu lo tuma luga consecuentemente,
A.T.A. ta percura cu ta mantene un relacion estrecho y fructifero cu e socionan di sector
turistico na Latino America.