Page 8 - MIN VOS 8 DEC 2015

Minister Alex Schwengle: Institucionnan a participa pa duna contenido na ley pa sigura
calidad y capacidad di cuido
Monday, 07 December 2015 23:01
Comparti

E forma den cual e comunidad di Aruba ta desaroyando a conduci na e decision di parti di Ministerio di
Salubridad Publico for di seis aña pasa pa cuminsa investiga y sondea e establecimento di un ley cu ta
percura pa sigura e calidad y capacidad di cuido pa nos grandinan.

Den transcurso di añanan por a nota cu organisacionnan priva a establece diferente cas di cuido rond
Aruba, banda di e institutonan cu ta resorta bao di SABA, tanten cu ainda no tin un ley cu contenido
bastante amplio pa sigura cu e calidad di e cuido cu ta wordo brinda ta consistente y di un nivel halto.

Minister dr. Alex Schwengle tabata den parlamento dialuna, despues cu a manda e kaderwet pa
parlamento pa e miembronan prepara nan preguntanan algun siman pasa. Despues di un reunion
intensivo y interesante, den oranan di atardi Parlamento a pasa e ley cu 12 voto “pro” y cuater voto
“contra”. Algun miembro di Parlamento di fraccion di MEP y fraccion di PDR no tabata presente pa e
reunion, ni pa votacion.

Den e ley ta stipula diferente punto cu e casnan di cuido y instancianan concerni cu cuido, interes y
bienestar di hende grandi na Aruba mester uza como un fundeshi pa contribui cu e contenido di e ley. Den
otro palabra, e stakeholdernan aki lo ta esunnan cu lo duna contenido na e ley, hunto cu instancianan
gubernamental; e “Ouderenafdeling” di Departamento di Salud Publico, cu a wordo estableci
recientemente, ta un partner esencial y central den e procesonan cu ta y lo ta tumando luga.

Inspeccion di Salud, cu ta den proceso di establecimento, y Plataforma di Salud tambe lo hunga un rol den
e procesonan pa cu e ley aki. Ora cu e ley ta estableci, Inspeccion di Salud, hunto cu Gobierno, lo ta
encarga cu supervision y control riba su cumplimento, esta e parti di “handhaving” pa cu e ley.

Minister dr. Alex Schwengle a splica cu e ley aki ta hopi importante y ta duna inicio na mas trabao, esta pa
por duna e ley contenido mester di participacion intensivo di e stakeholdernan cu ta entre otro e
institucionnan manera SABA y casnan di cuido priva, hunto cu un otro organisacionnan manera Wit Gele
Kruis y Departamento di Asuntonan Social, cual tur ta encarga y concerni cu cuido di hende grandi na
Aruba.

Gobierno no ta bay dicta, pero mas bien ta keda encarga cu e “handhaving” pa medio di instancianan
independiente manera Inspeccion y otro instancianan gubernamental, e mandatario a splica, agregando
cu ta logico cu e “veld” no por ta encarga cu e parti aki. E ley mester percura pa un maneho substancial y
duradero pa medio di introduccion di reglanan y rekisitonan cu ta percura pa proteccion di nos
grandinan. Minister Schwengle a splica cu e “Ouderenafdeling” lo duna apoyo na e “veld” tambe den e
procesonan pa cu cumplimento cu ley y lo yuda nan yega na e nivel desea.

Un ley pa cuido di hende grandi ta un necesidad grandi na Aruba, como cu actualmente e calidad no ta
bon y no tin suficiente capacidad pa carga e cuido tampoco y tin falta di un maneho integral, Minister