Page 15 - MIN ON

Minister Arends ta haci entrega di plakaat na e miho

graduado di VWO Roderick Tapia

Friday, 07 July 2017 20:56

1

Comparti

Tabata un anochi bunita cu un ambiente colma di positivismo den Renaissance Convention Center
diahuebs anochi.
Un grupo grandi di hoben a haya nan diploma y mundo tana nan pia. E futuro ta den nan man y awor ta
keda na cada un di nan pa scoge un estudio, sea aki of den exterior y traha asina riba un carera briyante.
Minister di Asuntonan Economico na nomber di Prome Minister Eman a entrega un plakaat y un regalo
na e miho graduado di Colegio VWO Roderick Tapia.
Riba e cijferlijst di Tapia ta pronk tres tien, dos negen, tres acht y dos zeven. Impresionante. Na
momento cu el a lesa su puntonan tur presente a aplaudi su logro den forma abrumador. Caribbean
Mercantile Bank a bin cu un cheque di mil dollar como regalo pa Roderick. Na momento cu Roderick a
hiba palabra, el a gradici su mayornan, su famia, su amigonan y su amiga Naomi, kende semper a kere
den dje. Mesora el a bisa tambe cu como miembro di Aruba Lions Club e ta regala su check na e Fondo
Social di Colegio Arubano. E gesto aki di Roderick a emociona tur presente y cay den asina bon tera cu e
representante di Banco CMB a bisa cu e ta regal'e un otro mil dollar pa e usa pa su mes.
Minister Richard Arends cu masha entusiasmo a bisa cu p'e como ex Colegiano ta un honor cu e por a bin
na e graduacion representando Prome Minister Mike Eman. "E cijferlijst ta realmente impresionante y
esaki no ta solamente danki na Roderick su perseverancia, pero tambe danki na e apoyo cu e ta ricibi di
su mayornan, famia y amigonan, pero sigur tambe na e instituto educacional cu nos tabatin e privilegio
di por a forma parti di dje, cu ta Colegio Arubano." Minister Arends a manda palabranan di felictacion na
tur graduado di Aruba.
"Nos como gobierno ta sigui apoyo y inverti den educacion. Colega Hooyboer semper ta hopi alerto riba
desaroyonan cu tin den educacion, semper creando oportunidadnan nobo. Maneho economico di
Gabinete Mike Eman ta enfoca riba creacion di oportunidad pa p.e. un persona cu tin un exact pakket
por studia loke e kier, den ingenieria, tecnologia , inovacion y cu aki tin oportunidadnan pa e persona aki
ora e caba di studia y a gana experiencia afo y kier bin bek pa hiba Aruba padilanti. No tin nada mas
gratificante di wak tanto dedicacion di docente y studiantenan awenochi den e sala aki", Arends a bisa na
final.