Page 29 - MIN ON NOV 20,2015

24 AWEMainta Diabierna, 20 November 2015

ATSA a “Adopta” EPB

E Aruba Timeshare Association a dicidi
di yuda e scolnan di EPB riba nos isla

E ARUBA Timeshare Association (ATSA)

recientemente a lansa un proyecto envolviendo e
scolnan di EPB Hato y EPB San Nicolas riba nos isla.
E asociacion a ricibi e studiantenan di prome aña
di EPB na 12 di Aruba su resortnan di timeshare
pa un dia, ofreciendo un mitar dia informativo di
orientacion, y diberticion interactivo. En total, 250
studiante y nan mentornan a pasa e tempo ta observa
di serca e funcionamento di e industria hotelero, dor
di bishita pa nan mes tur departamento di hotel.

Presidente di ATSA y hotelero, Andy Osbourne a splica
cu e intencionnan di ATSA tabata pa sigura cuponan
p’e studiantenan, ya cu hopi di nan actualmente ta
haciendo nan stage n’e hotelnan, y lo sigui pa ricibi
empleo full-time despues di nan graduacion.
E colaboracion positivo aki entre e scolnan EPB y e
futuro dunadornan di trabou ta ser mira dor di ATSA
como un cooperacion desea y positivo.

E Asociacion tambe tabatin e deseo di por demostra
varios aspecto di e industria hotelero local,
compartiendo varios rumbo di carera cu ta obtenible
y tipo di trabou cu ta existi den e industria, variando
entre Cuminda & Bebida, Administracion, Posicionnan
Secretarial, Mantencion, Seguridad, Landscaping,
Housekeeping, Front Desk, Benta y IT, djis pa nombra
algun! Hospitalidad, e industria dinamico cu ta orienta
riba hende, e pilar economico principal riba nos isla, ta
permiti hopi hende hoben exitoso pa busca un carera
excelente y pa sirbi como ehempelnan p’e siguiente
generacion.

Cu e invitacion p’e studiantenan, ATSA tambe tabata
interesa den crea un forsa laboral constante y califica,
prepara p’e siguiente grupo di gerente, pa nan rol como
futuro lidernan. E retonan di recluta labor califica ta
bon conoci akinan, Osbourne a declara, y exponiendo
e industria na studiantenan interesa den nan añanan
formativo ta sirbi pa crea mas oportunidad pa futuro
empleo. Den bista di e hecho cu tabatin asina hopi
discusion ultimamente pa loke ta implementacion
creativo di ahustacionnan den e mercado laboral,
scolnan mester ta mas conciente di e necesidadnan
di e comunidad laboral y ATSA ta sinti sumamente
fuerte cu flexibilidad den e leynan laboral lo por crea
oportunidadnan adicional p’e hobennan aki, lansando
nan careranan di awor caba.

Basa riba e experiencia en general cu nan a ricibi for
di e prome esfuerso aki, sigur lo por conta riba mas
evento den futuro.