Page 33 - UTILITIES

S.V. RCA ta cla pa start campeonato 2017-2018 miho ilumina

Sunday, 23 July 2017 10:14
1

Comparti

Arubaanse Voetbal Bond a bishita veld di S.V. RCA, unda cu a entrega algun bombio pa asina yuda ilumina e veld
miho.

AVB a acerca CONCACAF pidiendo nan e sosten pa asina por a busca e bombionan cu algun mester di dje. S.V. RCA
ta masha contento di por a ricibi e ayudo necesario y a gradici AVB pa esaki.

President di AVB, Ing. Richard Dijkhoff, a indica cu nan ta sigui riba e proyecto cu nan tin conhuntamente cu
CONCACAF, unda ta dunando ayudo na e organisacionnan cu ta miembro di Arubaanse Voetbal Bond. E necesidad
grandi cu nan tin ta e bombionan y e biaha aki a toca e turno di S.V. RCA. E organisacion a ricibi e bombionan pa
asina e tereno lo ta miho ilumina. S.V. RCA ta un organisacion grandi di cual nan tin hopi miembro y por medio di e
yudansa di AVB, esaki a yuda e organisacion acapara tur division cu nan tin durante e siman.

Miembro di directiva di S.V. RCA, Jesmira Tromp, a expresa cu nan ta sumamente contento di por a ricibi e ayudo di
AVB di e proyecto cu CONCACAF. Na comienso di aña S.V. RCA mes a cambia algun di e luznan cu a kima. Nan a
haci esaki riba nan mesun forsa, pero AVB a acerca nan y duna nan e bombionan cu falta. Tur dia ta haci uzo di e
veld di S.V. RCA, unda cu e team di muchanan chikito te grandi ta train. E luznan aki lo yuda S.V. RCA, pasobra na
luna di Augustus nan lo inicia cu e campeonato di 2017-2018 cu luznan nobo.

A funda Arubaanse Voetbal Bond na aña 1932 y a afilia na CONCACAF na aña 1986 y despues na FIFA na aña 1988.
E ta e organisacion cu ta maneha futbol amateur y profesional riba nos isla, incluyendo e muchanan, hoben, hende
muhe y adultonan. E ta responsabel pa sanciona e refereenan y e torneonan di futbol organisa pa mayoria liga. Nan
oficina ta situa den Compleho Deportivo Frans Figaroa na Noord.