Page 30 - MIN SJA 3 MAART 2016

AWEMainta Diahuebs, 03 Maart 2016 33

Minister dr. Alex Schwengle a topa cu Minister di
Deporte di Canada

Explorando
oportunidad
pa landadonan
Canades train den
winter na Aruba

DURANTE di su bishita na Canada, Minister di Salud Publico, Deporte y Cuido

di Nos Grandinan, dr. Alex Schwengle a reuni cu Minister Carla Qualtrough,
kende ta encarga cu e carteranan di deporte y asuntonan di personanan cu
deshabilidad. E homologonan a combersa tocante di diferente oportunidad pa cu
colaboracion riba tereno di deporte y a bay di acuerdo pa sondea e posibilidad pa
e organisacion Canades di landamento adopta Aruba como nan pais pa training
durante di e temporada di winter.

Minister Qualtrough a expresa cu e ta satisfecho cu tin un bon relacion entre
Canada cu Aruba y ta e entusiasma cu loke Aruba ta haciendo encuanto di deporte,
entre otro pa por logra pa e muchanan ta mas activo. “Nos sa e beneficionan di
deporte y nos ta comparti Aruba su compromiso pa cu tin muchanan saludabel
y contento,” Qualtrough a bisa.

E Minister, kende tabata un landado competitivo riba nivel nacional y a
representa Canada na weganan Paralimpico den pasado, actualmente tin
tres luna den e funcion como un miembro di Gabinete Trudeau. Su vision ta
pa sigui comprometi pa cu apoyo di deporte na nivel halto y ta di opinion cu
mesun importante cu deporte na nivel halto, ta deporte cu ta wordo eherce pa
diberticion. El a agrega cu ta importante pa ofrece actividadnan saludabel, y
oportunidadnan sigur pa muchanan por disfruta di ta activo. E beneficionan nos
tur sa kico nan ta, incluyendo balornan cu ta wordo siña pa medio di participacion
na haci deporte, el a bisa.

E mandatario a splica cu ta posibel pa Aruba y Canada colabora riba diferente
tereno, incluyendo oportunidadnan pa intercambio di ideanan y experticio
entre e dos paisnan.

Minister Qualtrough a bisa cu e ta bay papia cu “Swimming Canada” tocante e
posibilidad pa nan train na Aruba den e lunanan di winter, como cu semper nan
ta buscando luganan y alternativanan interesante pa nan landadonan.

“Sport tourism” ta riba e agenda di Minister Schwengle, kende a bisa cu e
ta sigui ofrece Aruba como pais pa winter training y otro actividadnan. El a
splica cu si e idea cu el a presenta na e minister Canades haya acogida, hunto
cu organisacionnan di deporte Canades lo por crea facilidadnan of upgrade y
amplia facilidadnan existente pa acomoda atletanan Canades pa nan winter
training na Aruba.

A papia principalmente tocante di landamento. Un oportunidad asina pa Aruba
ta traduci atrobe , entre otro den miho mantencion y expansion di e facilidadnan
di deporte envolvi y lo provee sigur un “push” grandi pa deportistanan di Aruba
mes.