Page 3 - KPA JULY 10

Pagina 4
Drs. Booshi Wever di UPP:
ORA ZERO PA NOS ARUBIANONAN!
Ultimo dianan nos por a tuma
nota di hopi acontecimento cu ta indica
cu e partido na mando ta perdiendo su
sosten den pueblo na un gran forma. Ta
bisto cu e gobierno no tin como prioridad
proteccion di nos ciudadanonan, y ni
tampoco e gobierno aki ta duna muestra
di tin compasion cu un pueblo cu semper
a contribui sagradamente na e desaroyo
di nos Pais, pero cu awor aki ta wordo
diariamente confronta cu un maneho
anti-Aruba. Un maneho cu ta causando
hopi dolor den hopi hogar aki na Aruba
pa causa di medidanan inhumano.
Pero no ta e medidanan inhumano
contra nos pueblo so ta loke e gobierno
aki a bin ta azota nos pueblo cu ne;
tambe a percura pa un perdida di nos
autonomia, manipulacion cu cifranan
di turismo y firmamento di contractnan
cu ta yena saco di financistanan di
campaña di AVP. E resultado di tur e
actonan devastador cu e gobierno a bin
ta ehecuta consecuentemente e ultimo
5 aña, ta cu e pueblo a cuminsa lanta
for di soño y poco poco ta demostrando
mas abiertamente nan disgusto y
asco contra e gobierno maligno aki.
For di siman pasa caba nos por a ripara
cu e “spindoctors” di e gobierno actual a
cuminza cu un racha nobo di manipulacion
den medionan di comunicacion y riba e
rednan social. A cuminsa mustra riba tur
e biyones di dollar cu e hotelnan na Aruba
lo bay ta inverti pa mehora nan producto.
Tambe a core tene un encuentro na
Carnival Village na unda a rifa un auto pa
1 florin. Asina nos por a tuma nota di con
politiconan y algun director “comprometi”
ta purba di trece e “bon” noticia den pueblo.
P.e. e apoyo di e “Green Corridor” door di e
director di DOW, un funcionario di HOH cu
ta presta su mes pa yuda cu e manipulacion
cu e proyecto corupto di hospital, y alavez
diripente ta informa cuanto “ilegal” ta wordo
gará y deporta. Pero esun cu a corona
e obra maestro di manipulacion di nos
pueblo ta e anuncio hipocrita di e minister
di Labor Paul C. cu a anuncia e “Gran”
noticia cu lo no permiti ningun musico
stranhero bin traha aki na Aruba mas.
Permitimi ilustra con hipocrita e minister aki
ta: a aparece un documento unda e minister
mes a duna e instruccion, of en todo caso
a bay di acuerdo, cu ya caba despues di
3 aña un trahador stranhero no mester
bay Departamento di Labor (Jobcenter)
mas. E consecuencia di e decision aki ta
cu jobcenter no por determina mas si tin
Arubiano pa haci e trabao. Ta igualmente
interesante pa sa cuanto ta e cartanan cu
e mesun minister aki ta manda pa DPL
pa duna instruccion pa cambia conseho,
ora cu funcionarionan di DPL ta mustra
cu tin Arubiano pa haci e trabao y tambe
lo ta interesante pa haya sa cuanto di e
“ilegalnan” cu mester a wordo deporta, lo
a presenta na aeropuerto cu un carta firmá
pa e minister concerni cu un “ontheffing”
di e tempo cu e no mag di drenta Aruba.
Alavez nos a tuma nota di e hecho cu tin un
Chines cu a wordo controla recientemente
y e Chines a yama e mesun Paul C. y e
Chines a pasa e telefon pa e empleado
na unda Paul C. a bisa e ambtenaar pa
no haci control eynan. Y awor e Paul C.
aki kier bin hunga e defensor di e clase
trahador Arubano. Tipo di actonan aki no
ta cay bao di CORUPCION???
Biniendo back riba e asunto di cambio di
maneho riba e asunto di 3 aña, mester
ser bisa cu esaki, banda di e hecho cu ya
caba un Mericano no mester bay ni UN
biaha Jobcenter, esaki ta significa cu nos
por bisa ayoooo na cuponan di trabao pa
nos propio Arubianonan.
Pakico nos ta bisa asina? Ta conoci cu
e gran mayoria di e empresanan grandi
aki na Aruba ta den man di Mericano,
dus eynan ya caba nos Arubianonan
mester bay competi cu e Mericano cu
ya no mester bay mercado laboral.
Mescos cu ta conta pa Hulandesnan
Europeo. Y awor pa completa e obra,
TUR otro stranhero no mester bay DPL
pa mira si tin Arubiano pa haci e trabao.
Si nos tuma den consideracion cu gran
mayoria di estudio ta dura 4 pa 5 aña, esaki aki di e gobierno y e gobernantenan
ta significa cu ora cu nos Arubianonan
Diabierna Juli 10 2015
caba nan studio, ya caba tin un stranhero
riba e stoel ey. Sin conta cu basá riba e
tratado asina yamá “family-life”, e casá y e
yiunan MESTER wordo admiti. Esaki kier
meen cu di awor padilanti no tin trabao pa
nos Arubianonan, ni lo bay tin schoolnan
pa nos muchanan Arubano.
Pa pone e cherrie riba e corupcion cu
tin den henter e asunto di permisologia,
ata awor e minister encargá cu DIMAS
ta nombra un di su ambtenaarnan mas
corupto como Adjunct Directeur na Dimas.
Awor e fiesta ta bay bira un bacanal di
berdad. E minister encarga cu Dimas
ta duna instruccion na Radhi Kahn pa
haci actonan contra ley, y probablemente
contra pagonan astronomical y e mucha
manda aki na su turno ta manda un
señal pa e otro “handlanger” cu ta
un tal Mario Wever, cu awor a wordo
recompensa cu e posicion di Adjunct
Directeur, ni cu esaki probablemente ni
tin un diploma di Mavo y cu a drenta Dina
como bode y awe e ta Adjunct Directeur.
Sin ningun clase di solicitud habri
y pasando un cantidad di hende
cu educacionnan hopi avanza.
Den un proximo articulo nos lo bay
mustra con e directora actual a ser corta
formalmente y cu e mucha manda aki lo
ta totalmente encarga cu otorgamento di
permiso. Awor e bacanal y e bonche ta bay
sinta y ta bay haya un forma espectacular.
Unda sindicatonan y gremionan ta keda?
Te ki dia nos ta bay keda acepta e cosnan
maligno aki? E ora zero a yega pa nos
sociedad Arubano. Si no para e rumbo
cu nos ta bay, dentro di masha poco E
ARUBIANO lo ta un INDIGENA cu lo
bay bira un ser humano cu por ser mira
como un atraccion turistico den Parke
Arikok. UPP cu ta e partido cu ta para
pa e “ARUBIANIZACION” lo deshaci di e
maneho anti-Arubiano aki, y lo bay duna
balor na e ARUBIANO.
Nos ta cla pa e lucha aki y den a caso
aki ta “E ARUBIANO SÓ POR SALBA E
ARUBIANO”.