Page 30 - MINISTER PAUL CROES - APRIL 8 ,2015

Den e siman tras di lomba a tuma lugar un reunion general cu tur e trahadornan di contratista cu ta
miembro di wab pa cual aki presidente di sindicato STA, Diego de Cuba a splica mas di e decision cu e
trahadornan a tuma, si no tin solucion lo bay den accion.

E ta sigui splica cu ta trata aki di Croon Caribe, Arubaanse Wegenbouw, Albo, pa delibera loke ta e
contra proposicion cu nan a ricibi for di e dirigentenan di WAB, cu ta e organisacion di companianan
grandi di construccion na Aruba.
Lamentablemente e contra proposicion cu Wab a manda pa sindicato STA a cay den mal tera cerca e
empleadonan y cerca STA tambe el a cay manera un baño di awa friu.
Esey ta loke nan a bin cun’e. A reuni cu e empleadonan y nan tabata hopi hostina. Nan a duna un
mandato pa manda un contra proposicion riba e contra proposicion cu Wab a manda. Esey ta bay wordo
manda pa Wab, pero hecho ta keda si cu locual cu Wab a trece riba mesa ta cos di hari y STA no ta
negosha pa coy loco. Nan ta negosha pa cos drechi. Caminda cu ta wak cu por, lo pusha. Caminda cu no
por, sa con pa mantene. Ta ripara cu tin hopi compania na Aruba cu ta prospero apesar di e situacion,
pero nan ta haci mal uso di e situacion general, pa nan bin cu nan fechorianan. Segun de Cuba, STA ta
studia e situacion minuciosamente y den e caso aki e trahadornan, e mesun anochi ey a firma e
presentielijst y conforme cu e presentielijst tambe nan a firma cu nan ta sostene un posibel accion.
Awor aki tur trahador ta bezig ta firmando un lista pa sosten pa un posibel accion, pa si e cos aki mester
bay desemboca den un caso den corte, tin e backup di e empleadonan.
Segun STA, e ta increibel con por pone cierto aumentonan asina documenta riba papel. Ta cosnan asina
ta cos di hari. Aki STA lo bay ta hopi fuerte den e caso di WAB y no ta spera cu no desemboca den un
accion manera a pasa a algun aña atras, cual tabata hopi fuerte.
STA a palabra cu WAB cu lo sinta bek na mesa dia 23 di April proximo, pa bay trata e asunto aki.
A puntra de Cuba kico ta e punto di bista di wab cu no por yega na duna un aumento na e trahadornan.
Un reunion cu caracter di urgencia ta na su lugar, segun de Cuba. No sa si Wab lo bay schakel in e
mediador di gobierno. Si esey no ta e caso cu negociacionnan tranca, di parti di STA si lo schakel in e
mediador, pa wak si por Sali for di e impasse aki.
De Cuba a sigui splica cu argumento fuerte Wab no tin. Proyecto tin na cantidad. Tin Barcadera, tin
Hospital, tin aeropuerto cu ta core te 2018 te asina leu, dus proyecto tin. No tin un argumento valido
fuerte pa por convence sindicato, cu locual cu e sindicato propone no por cumpli cune. A base di esey ta
bisa cu ta sinti cu nan ta sigui actua den mesun estilo cu nan tabata actua prome cu a drenta Wab.
Cu esaki no por biba cu nan awendia, pasobra belasting ta come den e salario. Mester un aumento cu e
trahador por wak cu e por refleha den su salario mensual of salario quincenal. Manera cu nan ta
haciendo, esey no ta bay refleha, segun de Cuba.
Esaki ta e dolor cu ta reina. De Cuba ta bisa un biaha mas cu ta un berguensa pa mira hendenan cu ta
gana dineral. E hendenan aki ta gana hopi placa. Dicon kier biba lekker sin laga e trahadornan biba un
bida rasonabel.
Tin e oportunidad pa duna e empleadonan esey. Pakico no dunanan e oportunidad ey. Construccion ta
un trabao hopi duro. Asina ey no por trata e empleadonan. Nan merece miho y STA ta para 100% nan
tras. Si tin cu bay guera, ta bay guera y e empleadonan tambe ta para cla pa esaki.

http://masnoticia.com/nos-kier-nos-derecho-y-si-no-ta-accion-nos-kier/