Page 46 - MIN ARENDS 3 JULY 2017

Mike de Meza: Awe Aeropuerto ta inicia proyecto di mas cu
12 miyon florin

Sunday, 02 July 2017 19:40
1

Comparti

Como parti di su maneho di permiti nos companianan estatal pa por maneha nan mes independiente y
sin metemento constante, Ministerio di Turismo, Transporte, Energia y Medio Ambiente ta masha
orguyoso di e inversion di mas cu 12 miyon florin cu Aruba Airport Authority N.V. a anuncia siman pasa.
Minister ing. Mike de Meza ta convenci cu e gerencia dinamico na Aeropuerto ta tene cuenta cu
desaroyonan den e mundo di aviacion y turismo, ora tuma decisionnan asina den cual a largo plaso ta
henter nos economia lo probecha di dje. E inversion aki ta den e prome fase pasobra e proyecto completo
ta di 350 miyon florin den 2 aña di tempo.

E proyecto ta encera rehabilitacion di e posicionnan di parkeo 1 y 2 balora na 7 miyon dollar. Lo cambia e
superficie di concret, instalacion di e infrastructura pa e fuel hydrant system y e relocacion di e fundeshi
nobo pa e brugnan pa pasahero asina aumentando e tamaño di Gate # 2 pa acomoda avionnan tipo wide-
body di categoria “E” manera avionnan B-787 y A-330. Lo instala 2 brug di pasahero nobo.

“Henter e inversion aki ta forma parti integral di e programa continuo di mehoracion na Aeropuerto, den
nan esfuerso pa renoba partinan cu ta birando bieu y mehora flexibilidad di e facilidadnan”, asina
Minister Ing. Mike de Meza a splica. Awe dialuna lo cuminsa cu fase # 1 cu ta encera cu ta cera
posicionnan di parkeer avion # 2 y # 3 pa 6 siman largo. Ora cu fase 1 keda cla, fase 2 lo cuminsa, unda
cu gate 3 lo bolbe den servicio mientras cu gate 1 y 2 lo keda cera pa un periodo di 4 luna. Si tur cos cana
segun schedule, dia 14 di December 2017 e proyecto mester ta completamente cla y entrega.

Ta bon pa agrega cu ceramento di e gatenan lo trece un cantidad di reto pa e operacionnan diario na
aeropuerto, pero lo adapta operacion pa por minimalisa impacto riba pasaheronan y riba operacion di
avionnan.
“Cu e inversion grandi aki den nos economia y den mehoracion di e servicio na Aeropuerto, nos ta
convenci cu Aruba Airport lo ta cla pa por sirbi avionnan mas grandi durante e temporada peak di
winter, asina cu entrega e proyecto aki na December proximo”, di acuerdo cu Minister Ing. Mike de
Meza.