Page 18 - AM211002

Diasabra, 02 October 2021 AWEMainta.com 18

UN SNECHI DI PALABRA DI DIOS

XXVII DIADOMINGO DEN AÑA 03.10.21 # 331

I lectura: Gen 2, 18-24
Salmo 128

II lectura: Heb 2, 9-11
Evangelio: Mc 10, 2-16

Den e tempo aya algun fariseo cu kier a laga Hesus cay den trampa, a bini cerca dje y puntr’E: “Un
homber por divorcia di su casa?” Hesus a contesta nan: “Kico Moises a ordena boso?” Nan a contest’E:
“Moises a duna permit pa un homber traha un papel di divorcio y manda su casa bay.” E ora ey Hesus a
bisa nan: “Pasobra boso ta cabesura, Moises a skirbi e mandamento ey. Na cuminsamento Dios a crea
homber y muhe. Pa e motibo ey un hende ta bay laga su mama y su tata pa uni cu su casa y nan dos lo

bira un. Asina nan lo no ta dos persona mas ma un. Kiermen hende no por separa loke Dios a uni den
matrimonio.” Ora nan a yega cas atrobe, e discipelnan a bini bek riba e asunto.
Hesus a contesta nan: “Esun cu manda su casa bay y casa cu un otro muhe, ta kibra fieldad di matrimonio.

Si e prome muhe ey casa cu otro hende, e tambe ta kibra fieldad di matrimonio.” Algun hende a trece
poco mucha pa Hesus pone man riba nan, ma e discipelnan a scual e hendenan. Ora Hesus a mira kico
tabata pasa, El a rabia cu nan y bisa: “Laga e muchanan bini cerca Mi. No kita nan di bini, pasobra reino
di Dios ta pertenece na esnan manera nan. Mi ta sigura boso: esun cu no ricibi reino di Dios manera un
mucha, nunca lo no drent’e.” Despues El a brasa e muchanan, pone man riba nan, bendiciona nan.

Palabra di Señor.

MENSAHE

Dios a crea hende pa biba den comunidad. Solamente compartiendo cu otro nos por practica e divino
ley di amor. E base y luga di formacion pa bida comunitario ta un famia. Anto esun tin principio den
matrimonio. Matrimonio ta un regalo di Dios di cua humanidad ta dispone fo’i su creacion. Fo’i principio
tambe a surgi problema di convivencia matrimonial. Moises den su tempo a traha un documento cu a

permiti divorcio di e pareha. Pero Hesus ta bisa di un forma cla cu tur esey a sosede pa motibo di nan
cabesura. Otro traduccionnan ta bisa: ‘curasonnan duro’. Den tempo di Moises hende homber a gosa di
tur derecho, mientras hende muhe tabata trata como catibo di hende homber. Den circunstancianan ey
ta dificil pa papia di un matrimonio basa riba amor. Hende homber tabatin tur derecho riba hende muhe.

Hesus ta splica cu plan di Dios tabata otro: hende homber y hende muhe ta yama pa bira uno pa medio di
matrimonio. “Di naturalesa, e institucion di matrimonio y amor matrimonial ta ordena pa procreacion y
educacion di desendientenan, anto ta den nan e ta haya su coronacion glorioso.” (Cat. 1652)
Matrimonio ta algo sagrado y fundeshi di famia. Lamentablemente, e leynan civil den nos pais a pone

riba mesun nivel matrimonio sacramental, matrimonio civil y concubinato, incluso di hende di mesun
sexo. Nos mundo ta biba un crisis di matrimonio y por lo siguiente crisis di famia y sociedad. Cantidad
di divorcio ta kibra e neishi di seguridad pa e muchanan. Union liber a bira e standard di convivencia y
mundo ta ignora cu cada divorcio y bida den un relacion liber ta bida den adulterio (v. 12). Esey no ta

e plan di Dios. Sino e plan di e curasonnan duro, cabesuranan cu no ta respeta Dios. Unda nos ta bay?

ORACION

Señor, bendiciona tur famia di Aruba!

PROPOSITO

Evalua bo bida moral den bista di mandamentonan di Dios, pa bo persona y famia sea digno di ricibi
bendicion di Dios.