Page 57 - HOH

Intencion di e preguntanan ta pa comunidad por ta na altura di cual t’e paso y medidanan
cu a wordo tuma pa evita y den su defecto minimalisa e efectonan di e virus aki na nos
isla, pero tambe pa sa con Aruba ta prepara pa atende posibel caso of casonan di
Coronavirus.

Por mira riba diferente medio con e virus aki ta afectando diferente pais y kico e paisnan
ta haciendo pa contene e virus, cual danki Dios no tin un mortalidad halto manera otro
virus. Pero di otro banda, por wak e impacto grandi cu e tin riba economia no solamente
di e paisnan, pero economia mundial en general dor di e pasonan cu ta tuma pa contene e
Coronavirus, Dellanire Maduro a sigui splica.

Na China por ehempel a tuma medidanan extremo y cifranan ta indica cu en berdad e
pasonan aki ta yudando, pero di otro banda por mira cu na Italia den un par di dia e
cantidad di casonan a triplifica.

E raport 35 di Organisacion Mundial di Salud (cual ta wordo publica cada 24 ora) ta
indica cu globalmente tin 79,331 caso confirma di Coronavirus. Den e ultimo 24 ora a
aumenta cu 715 caso. 77,272 di e casonan aki ta registra na China mes y pafo di China tin
2,069 caso confirma na un total di 29 pais.

E total di personanan cu a fayece debi n’e virus ta 2,595 na China y pafo di China 23.

Mirando e situacion alarmante aki, ta importante segun Dellanire Maduro, pa manera
Organisacion Mundial di Salud ta conseha, prepara di manera adecuado y pesey ta hopi
importante den su rol di Parlamentario cu ta controla Gobierno, pa haya e contesta riba e
preguntanan haci na Minister di Salud Publico.