Page 10 - bon-dia-aruba-20210107

A10 hende
Diahuebs 7 Januari 2021

Gustave Nouel ta duna

curso di pinta portret na

Hulanda y den region di

Caribe

Tanto e masterclass como e cursonan nobo di sketch portret tabata full caba e prome
siman cu nan a ser ofreci. Y 'wachtlijst' pa su proximo cursonan na september 2021 ta
creciendo... Un curso di arte exitoso na Hulanda, cu o sin Covid!

E famoso pintor Caribeño, di Aruba, specialista den pinta portret, Gustave Nouel, ademas di
su carera internacional di arte, tin hopi experencia pintando portret riba caya na diferente pais,
hunto cu mas artista. Danki na e experencia internacional aki Gustave Nouel (GN) a crea un
curso efectivo y exitoso pa pinta portret, cu e 'secretonan' y base universal di artistanan riba
caya. Esaki ta haci pinta portret hopi facil... Tambe pa principiantenan!
Actualmente GN ta ofreciendo e curso nobo aki y 'masterclass' di pinta portret na 'Kunstcir-
cuit' , e centro di Arte principal di Deventer. Cursonan mester start 19 y 20 di januari 2021, si
nan no prolonga e 'lock-down duro' na Hulanda.

Tambe na Museo Terramar di Bonaire, workshops y performance di pintamento di GN a ser
planifica, na 2020. Dos biaha nan a ser posponi, pa causa di Covid... Awor, despues di pospone
e workshop pa Januari 2021, Museo Terramar, tin workshop y mas actividad artistico di GN
riba nan programa, di 1 te 9 di mei 2021. Riba 9 di mei (Dia di Mama) intencion ta pa presenta
e buki 'Maternidad', di Zuleika Coffie y Gustave Nouel, na Bonaire oficialmente. Caminda e
dos autornan lo firma algun di nan buki y hopi mas sorpresa!!

Gustave ta sigur cu e cooperacion cu Museo Terramar, lo duna su frutonan. Tambe na Corsou
y Sint Maarten, tin interes pa su workshops exitoso y pa presenta e buki 'Maternidad' y hasta
tin contacto caba pa cooperacion cu e Museo.
Biblioteca Nacional di Aruba, (directora Astrid Britten), a mustra interes pa presenta e buki
'Maternidad' den e cuater lenga mas papia na Aruba, cu 'imagen/pintura' di pintor Gustave
Nouel y 'poesia' di actriz, modelo y 'modelcoach' Zuleika Coffie! Esaki combina cu un even-
tual exposicion (digital o real) di pintura cu a ser publica den e buki 'Maternidad'. E proyecto
por conta tambe cu apoyo di Departamento di Cultura (director Siegfried Dumfries).
Sin embargo, un fecha concreto pa presentacion na Aruba no a ser fiha ainda.
Un soño di Zuleika Coffie y Gustave Nouel ta cu e buki y proyecto 'Maternidad' lo stimula
mas proyecto artistico y hasta mas intercambio cultural entre e islanan Hulandes den Caribe,
den futuro, despues di Covid-19.