Page 35 - DIARIO SEPT 29

DIAMARS 29 SEPTEMBER 2015 DIARIO PAGINA 35

Muñecos Quitapenas

Ta un custumber di e indjannan Maya na Guatemala
pa siña nan yiunan e leyenda di Los Muñecos Quitapenas
(popchinan cu ta kita preocupacion). For di masha jong
muchanan cu no por drumi ta haya 6 popchi chikito (di 2.5
cm grandi) anto ta wordo siña pa comparti nan preocupacion
cu un di e popchinan. Despues cu nan a conta e popchi nan
preocupacion, nan ta pone bou di nan cusinchi prome cu nan
bay drumi. Segun e leyenda, e popchi ta preocupa na nan luga
y asina ta permiti nan pa drumi trankil henter anochi y lanta
mainta sin preocupacion.
Leyendanan ta parti di tur cultura na mundo y tin masha
hopi leyenda, algun mas extraordinario cu otro. Leyendanan
ta mas dominante den culturanan caminda pa hopi anja poco
hende por a skirbi of lesa. E woordenboek Webster ta splica
cu un leyenda ta un storia cu a wordo conta di generacion
pa generacion pa hopi anja y cual su origen ta basa ariba un
evento real.
Pa comprende con un leyenda por cambia, door di a
wordo conta asina hopi biaha, por compara esaki cu e wega
di mucha yama ‘telefon’. Un grupo di un 20 of 30 mucha ta
sinta den un circulo y e prome mucha ta haya un frase pa bisa
den horea di e mucha sinta banda di dje. E ora e ta bisa e frase
(of loke e la tende) na e proximo mucha te ora cu e frase yega
bek na e prome mucha. Normalmente ora cu e frase a yega e
prome mucha bek, aunke cu e la keda cu algun aspecto di e
frase original, e la cambia asina hopi cu e ta causa un tremendo
hilaridad.
Insomnia y preocupacion parce di a bira parti di nos
cultura. Tur dia nos tin 100 cos pa preocupa ariba dje, for di
trabou, scol, cas, muchanan, financia, trafico, politica, parkeer
meter, cada un mas preocupante cu otro. Pio, si nos no tin coy
preocupa ariba dje nos mes ta inventa cos pa preocupa nos
mes. Preocupacion facilmente por crea un circulo vicioso di
stress cu por bira cronico, stroba nos di drumi y te hasta afecta
nos salud.
Afortunadamente e leyenda cu pa hopi siglo a yuda
e Mayanan pega soño por yuda nos cu nos insomnia crea pa
preocupacion y ansiedad.
E origen di e popchinan no ta conoci pero e
habitantenan di e seronan halto (Tierras Altas) di Guatemala
ta sigura cu e custumber y creencia di Muñecos Quitapenas ta
magico y a yuda masha hopi hende pega soño y drumi trankil.
Segun nan e popchinan ta yuda mehora bida y te hasta yuda
kita pesadia (nachtmerrie).
Ta dicon Muñecos Quitapenas ta traha y ta yuda hende
drumi trankil? Pa varios motibo! Preocupa ta un miedo (miedo
cu algo cu no mester pasa lo pasa of miedo cu algo cu mester
pasa lo no pasa) y ta un mecanismo di proteccion di nos mente
subconsciente. Door cu e responsabilidad mas grandi di nos
mente subconsciente ta pa proteha nos e ta keda pensa ariba e
problema te ora cu e haya un solucion, te hasta si no ta sisti un
solucion.
Pa motibo cu nos mente subconsciente ta traha cu
simbolo y imaginacion, pa e mente subconsciente e ritual
di e popchi ta mescos cu realidad. E ritual ta permiti pa
conscientemente nos laga los di e preocupacion y “entrega” e
problema na e popchi y duna nos pas mental.
Tambe na momento cu den bo mente e popchi, cu gran
pasenshi, scucha bo expresa bo preocupacion y comparti bo
miedo, bo problema of bo duda bo mente ta acepta pa transferi
esaki na e popchi. Pa nos mente subconsciente nos intencion,
nos fe y nos creencia ta e base di nos actuacion y ta loke nos ta
reacciona ariba dje. Esaki particularmente si nan ta acompaña
pa ritualnan.
Nos tur ta preocupa sea ta ariba cosnan den nos control
of cosnan cu ta fei di nos control. E problema cu preocupa
ariba cosnan fei nos control ta cu preocupa lo no cambia nada
y ta gastamento di energia innecesario. Mas lihe bo laga los di
e preocupacion y pensa ariba algo cu bo ta gradicido pe, mas
trankil lo bo ta y mas facil lo bo lo por drumi.
Bo kier purba uza e Muñecos Quitapenas? E prome 3
hendenan cu manda nos un e-mail na hypnosis@arubanet.com
lo ricibi un set regalo pa nan tambe por drumi dushi.