Page 20 - WEB
P. 20
E tema lo ta e situacion di gas cu ta afectando e funcionamento riba Waf di Barcadera.
Un situacion cu ta afectando comercio, operacion di waf di container y tambe birando un
problema pa barconan cu mester pasa laga container. Tambe tin e grupo di trucknan cu ta
lastra container cu ta sufriendo masha hopi mes cu e problema. WEB mester tin un
conferencia di prensa diaranzon mainta 11or riba un actividad. Pero a cambia e tema
mesora y ta pone esaki 10:30 pa asina splica e comunidad con nan lo ataka e problema
existente.
Algun dia pasa caba e director di WEB a splica nos mesa di redaccion cu e fuel oil cu nan
ta usando a mesun cu 80 aña pasa. Gobierno a cay aden pasobra na diferente occasion
keho di ASTEC y otronan trahando na Waf di Barcadera ta yegando cerca nan. A tene
reunion y a priminti pa traha riba un solucion. E solucion no tey ainda pero mientrastanto
a mira diferente protesta na Barcadera cerca e trahadornan di ASTEC, Truck Drivernan y
diamars mainta hasta Douane. Minister Xiomara Maduro a bay te na ASTEC pa sinta cu
nan y tambe director di Douane y SADA tabata presente. Despues di e reunion a dicidi cu
ta trahando riba e solucion di parti di WEB.
E solucion ta cambio di fuel oil den 8 siman. Kiermen asina cu e Fuel Oil actual termina
lo cuminsa usa of lo switch riba un fuel oil di mihor calidad cu menos sulfur. Esey nifica
tambe cu mester paga mas pa bari di fuel oil. Ta papia di un aumento di 7% riba cada bari
di Fuel Oil di mihor calidad cu menos sulfur. Cu esaki lo baha e molester actual di e gas
cu ta afectando operacion na Waf di Barcadera. Haciendo un calculacion, si e bari costa
por ehempel 60 dollar pa bari, cu e fuel oil nobo nifica cu mester paga algo mas cu 64
dollar pa bari. Kiko esaki lo nifica pa e operacion di WEB y prijs di awa y coriente ta
algo cu WEB mester splica of contesta den e conferencia di prensa yama cu caracter di
urgencia.
