Page 79 - MIN ECEM

Richard Branson papiando riba MSNBC di avancenan cu
Aruba ta haci den ‘Energia Limpi’

Tuesday, 06 June 2017 20:25
Comparti

Apenas algun dia despues di tabata riba nos isla, Sir Richard Branson a comparti e modelo ‘Green’ di
Aruba cu un audiencia di miyones di hende rond mundo.
Durante un entrevista riba e canal di television Mericano MSNBC, e empresario y visionario a papia di
con Aruba a caba di cuminsa traha riba e parke solar di mas grandi riba nos isla y un di esunnan di mas
grandi den nos region. El a papia tambe e maneho di sostenibilidad cu Gobierno di Aruba ta hibando cu
ta beneficia pueblo cu un reduccion den prijs di awa y coriente.
Sir Richard Branson a wordo invita pa papia na e canal di television pa reacciona riba e decision di
President Donald Trump pa retira Estados Unidos for di e Acuerdo Climatico di Paris. Aki e fundador di
Virgin Group, a conta e presentador Greta Van Susteren con e decision di e President Mericano, segun e,
no ta na beneficio di su pas pais y tampoco di henter mundo.
Riba e argumento cu e acuerdo di 174 pais ta uno cu ta mata cuponan di trabou, Sir Richard Branson a
bisa cu loke e presidente Americano a haci, den su opinion, ta bay tin un efecto negativo riba cuponan di
trabou. “Energia limpi por crea miyones di trabou y el a crea caba shen di mil di trabou.”.
“Mi a caba di bin bek for di Aruba caminda nos organisacion no lucrativo a organisa un di e parkenan
solar mas grandi na Aruba y como resultado pueblo di Aruba awo ta bay disfruta di un reduccion di 15%
den nan recibo di combustibel y e lo sigui baha,” Sir Richard Branson a splica. E ehempel cu a duna di
Aruba a siribi como introduccion pa e empresario splica con tin un cantidad enorme di trabou den
tecnologianan nobo.
No tin duda cu Sir Richard Branson a keda impresiona di loke el a wak ta tumando luga na Aruba. Aunke
cu e bishita na Aruba tabata cortico, el a logra bishita e Parke Solar di Parkeo na Aeropuerto, el a mira e
proyecto di Smart Community na Kibaima; tambe a bay na e Parke di Molina di Biento na Vader Piet y a
asisti na e ceremonia di groundbreaking di Sunrise Solar Park na Lago Heights.

Tur esaki ta proyectonan cu Aruba a logra danki na e colaboracion estrecho cu Rocky Mountain Institute
y Carbon War Room cu ta e organisacion no-lucrativo cu Sir Richard Branson a funda y ta bou direccion
di su President Jose Maria Figueres. E colaboracion entre Gabinete Mike Eman y Sir Richard Branson a
inicia na 2012 tempo cu Prome Minister Eman y e empresario a conoce y intercambia vision durante e
encuentro RIO +20 na Brazil hunto cu Su Mahestad Rey Willem-Alexander.