Page 5 - AWEMAINTA

Diahuebs, 31 Mei 2018 AWEMainta 5

A demanda mas claridad riba “Geschillenregeling”

Delegacionnan di Aruba, Corsou y Sint Maarten rabia cu Knops

TA PARCE cu e actitud "nonchalant" di
Secretario di Estado Raymond Kocks a lanta
spina di Parlamentarionan di Aruba, Corsou, Sint
Maarten y hasta di Hulanda cu ta participando
den e reunión Interparlamentario (IPKO) na
Hulanda. E motibo di nan malcontento ta e
forma con Knops a reacciona riba pregunta haci
na dje riba cual ta e plannan pa cu realisacion di
un Geschillenregeling pa Reino.

Ora cu nan a kere di haya contesta bon basa
riba e hechonan, a haya un carta cortico for di
Knops, den cual e ta bisa unicamente cu prome
cu final di aña e lo bini cu un proposicion pa un
Geschillenregeling.

Presidente di IPKO Alexander Pechtold a bisa cu
e “carta ta causa mas pregunta cu e contesta cu
nan a spera di haya. E carta no ta yuda nos den
nada y mi ta lamenta esaki,” el a bisa.
Den nomber di e delegacion di Corsou Giselle
McWilliam a bisa cu esaki tabata “un carta
hopi superficial cu nos no tin nada na dje”. El a
cataloga esaki di “schandalig” cu e concepto di
ley cu ta cerca Plasterk y e conseho concerni di
Raad van State no a wordo ofreci of entrega ainda
na Parlamento. “Nos no kier haya e sentimento
cu nos no ta conta. Loke ta tumando luga awo
aki ta inacceptabel pasobra esaki ta un tema
fundamental. Mi ta kere cu denter di cuatro
siman nos mester haya un proposicion di ley.”
Nan ta bisa cu e delegacion di Aruba por
medio di Rocco Tjon y Ady Thijsen a bisa cu e
reaccion di Knops ta inaceptabel. Sarah Wescot-
Williams, den nomber di Sint Maarten, a para
tras di e critico. “E carta aki ta un paso patras.”
Den nomber di e delegacion Hulandes Ruard
Ganzevoort a bisa cu e no ta “amused” pa e cos
aki.

E carta ta hopi cortico y no ta duna IPKO su
balor. E proposicion di ley di cual su contenido
no ta conoci pa nos mester bira mas lihe algo
real y manda pa e Parlamentonan.”
Ademas di decepcion riba e carta superficial di
Knops, e voceronan a bisa cu esaki no mester
kita atencion for di temanan urgente manera
finanza gubernamental, reconstruccion di Sint
Maarten y cooperacion practico pa haci miho
uzo di e oportunidadnan economico.
E delegacionnan a dicidi di expresa nan
malcontento na Knops pa cu su carta y a pidie
pa nan tin un “stappenplan” cla proime cu 18 di
juni y pa no mas tarda prome di november awor
tin un proposicion di ley pa tratamento di di
esaki entrega na Parlamentonan.