Page 20 - MIN TTC 7 APRIL 2016

Djaweps 7 Aprel 2016 41

Kontinuashon di pag 8
PRONTO TA KUMINSA
CAH, komo esun prinsipal
ku a tuma e inisiativa, ta
traha huntu ku Ministerio
di Hustisia i Curaçao Airport
Partners (CAP) den un forma
estrecho. Kuerpo Polisial
Kòrsou (KPC) ta envolví ku e
proseso di implementashon di
e-Gates di aserka i tin komo
tarea pa ehersé trabounan
relashoná ku e vigilansia di
frontera. E introdukshon di
e-Gates lo mester ta un sosten
di nan trabounan i esaki ta
nifiká un adaptashon chikí
den nan manera di traha.
Sinembargo semper bai
siguridat lo mester ta na
promé lugá i ser salbaguardiá.
Huntu ku e Ministerio di
Hustisia (inkluso KPC), CAH i
CAP pa medio di e inisiativa
aki ta aspirá pa duna un mihó
servisio i kòntròl di frontera
na aeropuerto di Kòrsou.
Curaçao Tourist Board
(CTB) i Curaçao Hotel and
Tourism Association (CHATA)
prinsipalmente tambe ta
envolví den e trayekto di
komunikashon di e fase di
implementashon, p’asina
realisá un introdukshon di e
e-Gates mihó posibel.
E introdukshon di e ED
Card ‘online’ di CTB por
ehèmpel a keda introdusí
simultaniamente kaminda tur
turista ku ta bin pa un estadia
di un máksimo di tres luna por
yena un ED Card. Sin un ED
Card yená ‘online’ turistanan
pues no por hasi uso di e
e-Gates. Vários otro instansia
di gobièrnu relevante tambe
ta duna nan sosten na
realisashon di e proyekto aki.
Resumiendo: ken por
hasi uso di e-Gates?
Pasaheronan di 18 aña
òf mas, ku por aktua i ser
responsabel pa nan mes, ku
tin un pasport Merikano,
Kanades òf Europeo ku un
chip.
Turistanan ku ta bin
Kòrsou pa un estadia di
máksimo 3 luna i a yena e ED
Card ‘online’.
Kurasoleñonan no bibá na
Kòrsou tambe mester yená
un ED Card ‘online’; mirando
ku no ta konsiderá nan komo
residente.
Por yena e ED Card ‘online’
via www.curacao.com i e
mester ta yená 24 ora promé
ku e vuelo ku destinashon pa
Kòrsou sali. Pasaheronan ku
ta bin Kòrsou pa un estadia
di mas ku tres luna òf ku
tin mester di un pèrmit di
estadia temporal, manera ta
kustumber lo mester dirigí
na mes na e balinan serka
Servisio di Imigrashon pa hasi
e kòntròl di frontera nesesario.