Page 3 - Tantri Basa Jawa Kelas 6 (Bab 3)
P. 3
Sunan Kalijaga
iki crita salah sijine Wali sanga
miturut tembang rawat-rawat bakul sinambiwara
Raden Mas Said, putra Adipati Wilatikta
Lokajaya, kondhange nalika dadi brandhal linuwih
seneng ngrampas bandhane wong sugih
wong cethil sing suthik dedana mbebagi asih
Bandha rampasan ora dipek dhewe
nanging didum-dumake
marang wong sing ora duwe
lan ora digatekake
sisane kleyang kabur kanginan pepindhane
Ing sawiji dina
Lokajaya ketemu wong tuwa
katon memelas ing tengah alas
“He wong tuwa, dak jaluk bandhamu apa nyawamu?!”
wong tuwa iku mesem grapyak sumanak
“Lokajaya, delengen kolang-kaling kae”
sakala kolang-kaling gumebyar rupa emas
Lokajaya kaget kepati
lir tinubruk mong luput pindha nirbudi
Lokajaya, yen ing donya iki
kang kok uber mung bandha donyaku
bebasane uripmu bakal peteng tanpa lampu
Ooo,...jebul kang dakrampog iki wong sekti
sing pantes dakdadekake guru pribadi
pepadhane lir sumur lumaku tinimba yekti
Lokajaya meguru sakehing ngelmi
Ing pungkase, Lokajaya njangkepi Wali Sanga
salin jeneng dadi Sunan Kalijaga
nyiptakake wayang kalawan gamelan
kanggo dakwah ing madyaning panguripan
Surabaya, 26 Mei 2016 (Widodo Basuki)
Tantri Basa kelas 6 kaca 36
