Page 12 - 19 Cotton SA September 2019
P. 12
/ OP DIE BOL
ONS GROET ’N LEGENDE
– HEIN SCHRÖDER
Hein se betrokkenheid in die katoenbedryf het oor ’n tydperk van meer as 50 jaar gestrek. In Januarie
1965 sluit hy aan by die Departement van Landbou waar hy as leerlingtegnikus in die katoenafdeling
geplaas word, en vir die eerste keer kennis maak met katoengradering en -klassifikasie en ander
verwante katoenfunksies. Gedurende hierdie tydperk studeer hy verder en verkry sy Nasionale
Diploma vir Landboutegnikusse in 1967. In 1987 word die graderingsafdeling wat onder Landbou-
en Produkstandaarde by die departement gehuisves was, oorgeplaas na die Katoenraad (nou Katoen
SA) waar Hein tot en met sy aftrede die posisie van kwaliteitsbestuurder beklee het.
Hein het hom oor die jare onderskei as ’n internasionale kundige op die gebied van katoenontleding.
Hy is een van ’n paar kundiges wat, voordat tegnologie sy opwagting gemaak het, die tegniek
vervolmaak het om katoen met die hand en oog te gradeer en te
klassifiseer. Ons sal hom altyd onthou vir sy passie vir die bedryf en
dat geen taak ooit te groot vir hom was nie.
Nadat Hein amptelik die aftreeouderdom van 65 jaar bereik
het, het hy vir verskeie jare nog sy dienste op ’n kontrakbasis aan
die bedryf beskikbaar gestel. Ongelukkig het sy gesondheid ’n jaar
of twee gelede begin agteruitgaan. Dit het hom gedwing om sy
betrokkenheid by Katoen SA verder af te skaal en uiteindelik die tuig
neer te lê sodat hy meer tyd saam met sy geliefdes kan spandeer.
Ons bring hulde aan ’n legende wat vir baie jare net sy beste
gegee het vir die bedryf waarvoor hy soveel liefde en passie
het. Sy teenwoordigheid en kundigheid sal beslis gemis word
en die voorsitter, raad en personeel by Katoen SA wens hom ’n
welverdiende ruskans en seën toe, met goeie gesondheid vir die
goue jare wat vir hom voorlê.
12 | Katoen SA \\ Cotton SA