Page 15 - DESPA

Alcohol ta aumenta e posibilidad pa haya cancer di pecho

Tuesday, 11 July 2017 20:24
1

Comparti

Asta un glas di alcohol pa dia por aumenta e posibilidad pa haya cancer di pecho. Esaki a bin dilanti den
e ultimo resultadonan presenta pa Wereld Kanker Onderzoeks Fonds (WKOF).
Apesar cu ningun estilo di bida por garantisa cu bo lo no haya cancer, investigacionan ta mustra cu 2 di
cada 5 caso di cancer di pecho por a wordo preveni door di no bebe alcohol, haci mas moveshon y
mantene un peso saludabel.
Resultadonan di un rapport recien cu WKOF na Hulanda a publica ta mustra cu tin prueba scientifico
fuerte ta indica cu asta consumo di un (1) glas di alcohol pa dia, manera un glas di biña of cerbez, ta
aumenta e risico riba cancer di pecho, tanto prome como despues di menopausa. E rapport ta mustra cu
moveshon fisico tambe por minimalisa e posibilidad pa haya cancer di pecho. Den casonan di cancer di
pecho prome cu menopausa drenta, ta trata aki di moveshon fisico intenso manera landamento y
coremento.

E investigacion a confirma tambe cu sobrepeso y obesitas ta aumenta e posibilidad pa haya cancer di
pecho despues di menopausa, cual ta e cancer di pecho cu mas frecuencia serca muhernan. Sobrepeso y
obesitas ta aumenta e posibilidad riba 10 otro tipo di cancer tambe manera entre otro cancer di tripa,
cancer di pancreas y cancer di higra.
Pa minimalisa e posibilidad pa haya cancer WKOF ta conseha pa no bebe hopi alcohol of no bebe alcohol
mes y tambe ta conseha pa haci hopi moveshon fisico y come mas saludabel.

Cancer di pecho ta e forma di cancer cu mas ta wordo diagnostica serca muhernan na Hulanda. Segun e
Nederlandse Kankerregistratie, na aña 2016 so ya como 14mil muher a wordo diagnostica cu cancer di
pecho y tur aña como 3mil muher ta fayece a causa di e cancer aki. Aki na Aruba cancer di pecho ta
aparece tambe den e top 3 di cancer serca hende muher.
E resultadonan den e rapport di WKOF ta basa riba 119 estudio di diferente pais rond mundo. A studia
como 12 miyon muher pa yega na e resultadonan den e rapport. Di e 12 miyon muhernan aki 260mil a
wordo diagnostica cu cancer di pecho. E analisis scientifico aki ta esun di mas grandi haci door di WKOF
desde 2010.

Pa mas informacion riba cancer por tuma contacto cu Koningin Wilhelmina Fonds su Centro di
informacion na Spinozastraat 9 of bel nos na 5820412.