Page 49 - MIN VOS - APRIL 15 ,2015

“Reparatietoeslag” no ta forma parti di e pensioen di AOV

 Apr 15th, 2015
 Local

Recientemente Banco di Seguro Social, SVb, a informa comunidad di Aruba y pensionadonan en
particular, cu a cuminsa cu splitmento di pensioen di parehanan pensionado. Esaki den
cumplimento cu articulo 4 di e directivo 79/9 EEG di Comunidad cu ta indica cu ambos persona
tin derecho riba pensioen di AOV. Den e comunicado aki tambe a indica cu ora suma e dos
pensionnan cu a split, hunto esaki lo ta mes un suma di e pensioen cu tabata ricibi prome.
Pa ilustra esaki lo uza un ehempel. Un pareha casa, cu ambos a biba henter nan bida aki na
Aruba y tur dos a cumpli caba e edad di pensioen, ta ricibi prome cu e splitmento pa luna 1.780
florin di pensioen di AOV mas tabata ricibi 200 florin di reparatietoeslag. Pues en total e pareha
tabata ricibi 1.980 florin tur luna.
Aki mester aclaria cu e reparatietoeslag ta un compensacion cu Gobierno di Aruba ta otorga,
mediante SVb, na e pensionado. E reparatietoeslag no ta forma parti di e pensioen di AOV.
Siguiendo cu e ehempel anterior, na momento cu SVb split e pensioen, cada persona lo ricibi riba
nan cuenta separa of e cuenta di banco hunto 890 florin di pensioen di AOV mas 100 florin di
reparatietoeslag. Pues cada persona di e pareha ta ricibi 990 florin pa luna. Si conta e dos
pensionnan hunto, lo yega bek na 1.980 florin.
SVb a manda un carta cu e decision di e splitmento pa tur e pensionadonan casa, di cual a split
nan pensioen. E decision cu SVb a manda ta menciona e suma cu ta coresponde na e pensioen di
AOV y esaki no ta inclui e reparatietoeslag. Manera a indica aki riba, e reparatietoeslag no ta
forma parti di e pensioen di AOV, pero ta un compensacion di parti di Gobierno di Aruba.