Page 3 - MIN VOS flip

AZV ta basa su mes riba consehonan medico di e riesgonan y no riba e hecho cu ta trata di
un baby handicap

Publication: Thursday, 11 February 2016. Categoria: General
Director di AZV Anko Ringeling
Den caso di baby Lunah

ORANJESTAD (AAN) – Den combersacion cu Anko Ringeling, director di
AZV, a haya un splicacion amplio di loke tabata e situacion cu Baby Lunah, su tratamento na Aruba y e motibonan pa
cual e no a wordo manda mesora pa exterior manera cu e mayornan y demas famia tabata desea.
Ringeling a splica cu nan a sinta dos biaha na mes cu e mayornan di Lunah. El a splica cu e baby a nace cu hopi
complicacion y algun handicap, pero tambe a surgi na otro complicacion cu tin di haber cu su stoma.
E pregunta a surgi na e momento ey si mester opera e baby of wanta un rato. Dokternan di mucha local, e
specialista cu lo mester a oper’e a sinta delibera y hasta a pidi opinion for di specialistanan experto na Hulanda y
asina a yega na e conclusion cu opera mesora ta trece hopi riesgo mirando estado di e baby.
A dicidi di trata Lunah cu cierto remedi, cu no tabata specificamente pa e problemanan cu e baby tin, sinembargo
practica a demostra cu e remedi a funciona pa e problemanan di Lunah. Hospitalnan di tanto Hulanda como
Colombia a bisa cu e remedi cu dokternan local kier a dun’e ta e caminda mas indica, mirando e riesgonan pa un
mucha asina den un operacion.
Segun e director a sigui splica, mayornan di Lunah a nenga e tratamento ariba menciona. A keda unicamente e
posibilidad di operacion, cual specialistanan di exterior a bisa di ta hopi riesgoso. E ora mester a busca un hospital cu
ta dispuesto pa considera e riesgo aki. AZV a aserca Fundacion valle de Lili na Cali, Colombia, cu ta un hospital cu sa
traha cu nan caba. Despues di e contesta aki, AZV a manda tur informacion medico di e baby pa e clinica, pa mira
con lo bay trata e baby, esta un tratamento of si ta opere.
Mirando tur e riesgonan cu un operacion lo trece cune pa e baby, AZV a pidi e mayornan pa firma un documento den
cual ta para cu nan a wordo poni na altura di e riesgonan, confirma door di opinion di hospitalnan den exterior cu a
bisa cu nan no ta haya un operacion responsabel. “Sabiendo tur esey, e mayornan ta scoge toch pa haci un
operacion. Y di e forma aki ta kita e responsabilidad di dokternan local pero tambe AZV pa e posibel consecuencianan
di un operacion.”
E operacion cu mester wordo haci ta pa drecha e situacionentre su stoma y tripanan, pa e cuminda pasa normal. E
operacion normalmente no ta uno complica y ta wordo haci regularmente na Aruba.