Page 30 - BNDIA ARUBA

A30 SERVICIO
Diahuebs 21 september 2017
DIP: niun info riba supuesto hotel nobo na Arashi

ARASHI – Den medio social nos a compronde cu tin un
hotel nobo na caminda pa Arashi. Nos a tuma contacto
cu entre otro Departamento di Infrastructura & Plani-
ficacion (DIP) pero nan ta bisa cu nan no tin ningun
informacion riba esaki.

Algun tempo pasa Bon Dia a publica riba posibel hotel cu
tabata den planificacion pa bini na Seroe Colorado. Despues
di varios siman ta busca informacion y sin por a haya nin-
gun aclaracion riba e rumornan aki, minister di infrastructura
Benny Sevinger a confirma na Bon Dia cu en berdad lo bin
un hotel di 1000 camber na Seroe Colorado. Akinan tabata
trata di dos inversionista Spaño segun minister Sevinger a in-
forma nos algun luna pasa. Esun cu ta mas leu den e proceso

pa haya e tereno segun e mandatario a conta nos e tempo ey, ta e grupo cu kier bin cu un hotel
di e cadena NH.
Aworaki tin rumor ta circulando riba un otro posibel hotel den planificacion pa e area di
Arashi. Un persona a post riba su Facebook publicamente cu el a haya confirmacion for di
fuentenan confiabel cu rumornan riba posibel hotel na Arashi ta berdad. E ta bisa cu desaroya-
donan di un tal compania Iberostar (un cadena di all inclusive Spaño tambe) lo bay construi
un hotel nobo di 800 camber banda di e beach di Arashi. Aparentemente lo tin acuerdonan
entre minister di Infrastructura Benny Sevinger (AVP) y entre otro miembro di oposicion
Dangui Oduber (MEP) pa por start e proyecto aki no importa e resultado di e siguiente elec-
cionnan.

Fake News
Parlamentario Desiree de Sousa Croes (AVP) a reacciona cu: “Esaki no ta berdad. Please guys,
stop di comparti mentira. Nos a tuma nota tambe cu Juan David Yrausquin a reacciona riba e
noticia aki bisando cu e ta fake news. E partido AVP a yega di menciona den pasado cu nan lo
sigui e recomendacion di profesor Sam Cole riba desaroyo di capacidad, populacion y cultura.”
Nos a tuma contacto cu parlamentario di oposicion Dangui Oduber, mirando cu su nomber
tambe a wordo menciona akinan. Ta papia di un posibel acuerdo cu si MEP mester bin den
gobernacion mes, lo aproba pa sigui cu e proyecto aki. “Cu ami ta na altura, mi no sa di ningun
proyecto cu tin na Arashi. Y e unico persona cu ta autorisa pa duna cualkier cos ta minister
Benny Sevinger. Pues mi ta kere ta minister Sevinger mester duna claridad riba e post di Face-
book caminda ta menciona nomber di diferente politico,” sr. Oduber ta bisa Bon Dia. “En
todo caso, nos ta den oposicion y nunca ningun proyecto di Arashi a wordo presenta na nos.”
Bon Dia no a logra haya un reaccion for di ministerio di Infrastructura riba esaki, pero lo keda
investiga y pendiente pa cualkier desaroyo.