Page 32 - flip

Castigo a keda mescos pa homber acusa di cende cas na
candela, pero e suma di demanda a baha

Publication: Tuesday, 12 May 2015. Categoria: Judicial

ORANJESTAD (AAN): Dialuna na Hof a duna su veredicto den un caso di apelacion di e
sospechoso O.M.B.V..

Ta asina cu O.V a wordo acusa di intencionalmente cende candela den un cas riba 24 di
November 2012, dor di pega e sofa na candela, dor di cual e cas a kima totalmente of
parcialmente y a forma un peligro pa e casnan bisiña.

E cas cu a wordo kima ta cas di e ex pareha di O.V cu cual e tin yiu.

Dia 4 di December 2014 e veredicto a cay den e caso y O.M.B.V a wordo condena na un castigo
di 360 dia, di cual solamente e 39 dianan cu el a sinta den detencion preventivo ta incondicional.

E 321 dianan cu a resta tin cu colga riba cabez di e acusado como castigo condicional, durante
un tempo di prueba di 2 aña.

Banda di esaki e acusado mester paga e persona perhudica 25.600 florin na daño.

O.V no tabata di acuerdo cu e veredicto y pesey el a dicidi di apela.

Mescos cu dia di tratamento di e caso di corte di prome instancia riba 13 di November, ora cu
huez a puntre si el a cende e cas na candela, el a bisa cu no.

Huez a mustre si riba e hecho cu riba e cama a wordo haya un boter di cervez y un stanley mes y
cu testnan di DNA riba e stanley mes a mustra cu rastronan di DNA di O.V a wordo haya riba
dje.

Tambe ta asina cu tabata tin un bentana kibra na e cas y parti paden di e bentana a haya
fingerprints tambe di e acusado.

Huez a trece dilanti tambe cu mama di un amigo di O.V a bisa cu semper ora cu e bebe alcohol, e
ta bay busca problema cu su ex pareha.

Segun huez, mama mes di O.V a bisa cu ora cu su yiu bebe, e ta capaz di cualkier cos.

Huez a mustra tambe riba e hecho cu den pasado na varios occasion O.V a cay cera, pa entre otro
ladronicia y menaza.

Huez a trece dilanti tambe cu dos siman prome cu e candela, e ex pareha di O.V a entrega un
denuncia contra dje, despues cu e lo a purba di cende e cas na candela.