Page 8 - Minister Mike De Meza

30 AWEMainta Diaranson, 15 Juli 2015

Minister Mike de Meza, despues di reunion cu ASU:

Falta poco pa Joe Laveist Sport Park habri
su portanan bek pa comunidad di Aruba

Fase dos ta casi completo!

FALTA masha poco pa trabaonan na Joe Laveist Sport Park keda cla

y asina cu Minister Mike de Meza haya e “thumbs up” for di Aruba
Sport Unie (ASU) cu e “infield running track” y e parti electronico
di e scoring board moderno ta completo, lo invita comunidad di
Aruba pa haci uzo di e facilidadnan completamente renoba.
E mandatario ta hopi contento cu e trabaonan haci y e decisionnan
cu a wordo tuma pa recobra e ambiente special cu semper tabatin
na Joe Laveist Sport Park – antes Lago Sport Park, y renoba e
facilidadnan, poniendo hopi enfasis y enfoke riba e rol importante
di e stadion den nos comunidad.
Minister de Meza a bishita Joe Laveist Sport Park e siman aki pa
haya un update di e trabaonan, cu porcierto ta detayenan minimo,
pero necesario, cu falta ainda pa por pone e stadion bek den uzo.
For di aña 2009, ora cu ASU pa prome biaha a cuminsa
deliberacionnan cu Gobierno actual, a dicidi riba tres fase di
renobacion y “upgrading” cu lo costa un total di mas of menos 13
miyon florin.
E di prome fase tabata pa pone luznan nobo, y e di dos a ensera un
lista di necesidad pa renoba y modernisa e stadion. E di dos fase
ta casi completo. E di tres fase t’e construccion di dos sporthal pa
deporte “indoor”.
E trabaonan cu a tuma lugar den e di dos fase a tuma su tempo, pero
actualmente e stadion cu ta cumpli cu normanan internacional di
baseball.
Joe Laveist Sport Park awor tin un veld di yerba artificial y klei
special, un scoring board moderno cu ta traha completamente
wireless riba remote control, dak di tribuna y tribuna nobo, y un
tribuna cu no tin pilar mey-mey y pues ta ofrece publico mihor
visibilidad.