Page 44 - Djarason 27 yuni 2018.pdf

44 Djarason 27 Yüni 2018
E kier a pasa mas
di un kilo di koka
Mama yòn ta
haña chèns di
oro serka korte

WILLEMSTAD.- Korte
ayera a tene konsiderashon
i a duna un akusado
femenino di edat basta yòn,
akusá pa trafikashon di
droga chèns di oro.
E ta keda akusá di a trata
na eksportá un kantidat
di 1240 gram di koka pa
Ulanda, dia 2 di novèmber
aña pasá den dos bòter i
bòm falsu di un pòtmòni.
El a presentá ayera dilanti
hues pa responsabilisá su
mes pa su akto.
E akusado a bisa ku e
ta aseptá ku el a kometé un
eror, pero ta desesperashon
a pone ku el a yega na e
desishon ei. El a splika ku e
ta mama di un yu menor i ku
e tabatin hopi problema ku
e tata di su yu. Esaki a pone
ku e kier a skapa di e hòmber
dor di hui bai Ulanda lag’é.
Segun e akusado, el a bai un
fiesta i a sera konosí ku un
tipo. Despues di dia ku nan
tabata papia, el a kont’é su
problema i a bis’é ku e ke
pasa droga pa e haña sèn
pe bai, keriendo ku esaki
tabata e manera di mas fásil
pa yega na e plaka.
E tipo a konekt’é ku un
amigu di dje ku a dun’é e
oferta pa hasi e trabou.
El a sigui konta, ku nan
a saka su potrèt pa ora e
yega Schiphol, e por wòrdu
rekonosé pa tuma e droga.
E akusado a ripití na
vários okashon ayera, ku
e ta lamentá loke el a hasi
i ta primintí ku esaki lo no
sosedé mas.
Fiskal a haña e
akusashon probá i a bisa
ku e ta tene kuenta ku ta
promé bes e akusado a hañ’é
den problema ku hustisia.
Tambe e ta tene kuenta ku
su edat i ku e tin un trabou
aktualmente pa e kria su yu.
Mirando esaki fiskal
a bisa di ta desviá for di e
demanda usual, i a pidi
18 luna kompletamente
inkondishonal ku un periodo
di prueba di 3 aña, 240 ora
di trabou pa komunidat i
guia di Reclassering p’e
akusado.
Hues den su desishon a
bisa e akusado ku e ta tene
kuenta ku e yu ku lo mester
di su mama i p’esei no ta
mand’é prizòn. Mirando
esaki hues a bai di akuerdo
ku e demanda di fiskal pero
a redusí e ora di trabou pa
komunidat na 200 ora.