Page 45 - Djarason 27 yuni 2018.pdf
P. 45
Djarason 27 Yüni 2018 45
“Beats & Feast”
di Curaçao Zoo ta
keda kanselá
WILLEMSTAD.- Curaçao
Zoo i Friends of the Curaçao
Zoo ta informá komunidat
ku lamentablemente nan
a haña nan ta kanselá e
evento “Beats & Feast”
ku lo mester a tuma lugá
dia 6 di yüli próksimo
na Tafelberg. Apesar di
trabounan intenso ku
a keda hasí pa bende
karchinan di entrada pa
e evento aki, no a logra
yega na benta di e kantidat
di karchi pa kubri su
gastunan. Kada un persona
ku ya a kumpra karchi, lo
risibí nan sèn bèk.
Curaçao Zoo i Friends of
the Curaçao Zoo ta gradisí
tur spònser i persona ku
a kere den e proyekto i a
duna tur di nan pa a hasi e
evento posibel.
Tur persona ku ketu bai
ke koperá ku Curaçao Zoo,
por hasi esaki dor di bira
un Amigu di Curaçao Zoo
hasiendo un donashon
di mínimo fl. 5,- pa luna
mediante di un ‘standing
order’.
“Unabes ku bo ta un
amigu di Zoo, bo lo keda
informá di tur desaroyo i
evento di e parke”.
Curaçao Zoo i Friends
of the Curaçao Zoo ta sigui
hasi su máksimo esfuerso
pa generá fondonan pa
desaroyá i engrandesé
e parke di bestia i hasié
aun mas mihó pa tantu
su abitantenan komo
animalnan ku ta keda
reskatá i hibá einan
regularmente.
Pa mas informashon
kon bo tambe por forma
parti di e famia di Curaçao
Zoo, bo por tene kontakto
na admin@curacaozoo.
com òf yama 736-0188.
