Page 25 - BRANDWEER - APRIL 28,2015

Gay Cora a canta ariba dia di Rey pa Simply Store
Publication: Tuesday, 28 April 2015. Categoria: Policial

ORANJESTAD(AAN)– Dialuna cu tabata e fecha di celebracion
di Dia di Rey riba e Isla y net cu hopi hende tabata presente na Wilhelmina
Park pa e acto di ceremonia cu mester a tuma lugar, diripiente por a mira con e
cielo banda panort a cuminsa bira scur, indicando cu tin un candela cu a cuminsa
den cercania di Oranjestad.
Mesora su tras por a tende diferente sirena ta bayendo direccion di centro di caya grandi y no a
keda nada otro na esnan di prensa pa haci, cu sali core y bay wak kico tabata pasando.
Yegando cerca, por a compronde cu aki tabata trata di e edificio unda Simply Store ta situa. E
tabata na candela y por a mira con Polis tabata cerando diferente caya, mientras cu Brandweer a
ubica su truck nan den diferente posicion di atake.
Cierto momento te hasta a manda saca e Truck cu ta worde yama Hoogwerker, pa bin na e lugar
y cuminsa ataca e parti di e dak, pa asina no permiti e candela extende pa e otro tiendanan.
Na momento cu e Hoogwerker a yega, por a mira con cu hopi trabao, a logra di staciona e Truck
aki den e area. Pasobra ora cu e arkitecto a diseña Caya Grandi nobo cu e rail di tram, a pone
cantidad di pilar chikito, cu ta stroba vehiculonan aki di move.
Tur e obstaculonan a pone e maniobra di e truck aki, un poco mas dificil.
Na parti mas panort di e edificio, por a tuma nota cu cierto momento esaki a cuminsa skeur y
huma tabata penetra entre e bloki nan y sali pafo, indicando cu e curazon di e candela tabata ey
tras mes.