Page 47 - KPA Feb 17, 2015

Polis a percura pa ordo durante Parada di Luz na San Nicolas

Friday, 13 February 2015 22:18
Comparti

Cu mas di 140 Polis riba pia, forma pa diferente ekiponan specialisa den e organisacion, Cuerpo Policial
Aruba a percura pa siguridad y orden publico durante e parada di luz na San Nicolas. E evento a bay den
bon ambiente y cu hopi hende, pero lamentablemente e cantidad di detencionnan tabata considerabel.
Ministerio Publico hunto cu Cuerpo Policial a anuncia adelanta caba cu durante e periodo di carnaval ta
aplicando e maneho di "Faya bo Haya" den cual e nivel di tolerancia ta baha un poco pa evita cu un grupo
chikito den comunidad lo por interpreta e bondad di Polis como un debilidad. Pa reenforsa e
posibilidadnan den nos codigo di procedemento penal, ta aplica listramento preventivo, den un esfuerso
pa busca droga y arma riba ciudadanonan den cercania di eventonan carnavalesco. Husticia ta duna Polis
un poder special pa listra un ciudadano, aunke cu no ta señal'e como un sospechoso.
Di otro banda, den e maneho di Faya bo Haya, ta duna e Fiscal Auxiliar e poder pa fiha un multa cu por
duna e sospechoso mesora. Pagando e suma ey, ta distancia di persecucion penal y encarcelacion,
dependiendo e delito cometi. Mas delito bo comete, mas halto e multa ta of hasta den algun caso multa
no por scapa e encarcelacion pendiente mas investigacion.
E parada di luz a sali pa 8:10pm y e prome grupo a yega final pa 1:05am mientras cu e ultimo grupo a
yega final pa 2:00am. Na tur Polis a conta 8 grupo den e parada cu hunto a alcansa mas o menos 2500
participante den e parada.
Te ainda e seccion administrativo ta finalisando e papelnan corespondiente na e multanan cu a paga pa
por a sali liber despues di a bringa, no respeta ordo di Polis, of otro posibel delitonan cometi durante e
parada. Den algun caso a detene hobennan tambe cu arma den nan poder, cu tambe ta motibo pa paga
un suma halto na multa prome cu por logra sali di prizon. Na tur e multanan riba e anochi di parada di
luz na San Nicolas a surpasa 6 mil florin.
Cuerpo Policial Aruba ta desea henter nos comunidad un feliz fin di siman carnavalesco. Ta nan
intencion pa ta tolerante cu esunnan cu ta bin pa pasa bon y aprecia nos cultura. Lo ta hopi mas estricto
cu esunnan cu ta bay eventonan carnavalesco cu otro intencion, specialmente pa daña e "bon ambiente"
cu tin awor aki. Pa nan tin celnan special wardando riba nan.