Page 17 - Awe Mainta 18 Dec 2021

AWEMainta.com DIASABRA 18 DECEMBER 2021| 17

UN SNECHI DI PALABRA DI DIOS

IV DIADOMINGO DI ADVENT 19.12.21 #342

I lectura: Mik 5, 2-5
Salmo 80
II lectura: Hebr 10, 5-10
Evangelio: Lc 1, 39-45

Den e tempo aya Maria a sali pura, bay bishita un cierto pueblo den e seronan di Hudea. Ora el a yega, el a drenta
cas di Zacarias y a cuminda Elisabet. Na momento cu Elisabet a tende e cumindamento di Maria, e yiu den su
scochi a bula. Elisabet mes a keda yena cu Spirito Santo. El a dal un grito duro y a bisa: “Dios a bendiciona bo mas
cu tur muhe y bendiciona ta e yiu cu bo ta carga den bo scochi. Na kico mi debe e honor cu mama di mi Señor ta
bishita mi? Tende, na momento cu bo a cuminda mi, e yiu den mi scochi a bula di alegria. Feliz ta esun cu a kere,
pasobra loke Señor a bis’e, lo keda cumpli.”

Palabra di Señor.

MENSAHE
Evangelio di awe ta mustra nos,
Maria como Mama.

Ya e ta na estado. Su “SI” na angel di Dios tabata e momento di concepcion.
Awor, PURA e ta bay den seronan di Hudea pa bishita su prima Elisabet. No ta trata di un
simpel bishita. Maria no ta bay su so. E ta bay cu Hesus den su barica.
- Maria ta bay pura pa hiba Hesus pa otro.
- E ta bay pura pa yuda Elisabet cu tambe ta na estado, pasobra un persona cu ta carga
Hesus den su curason ta sinti responsabilidad y necesidad pa sirbi otro.
Un persona cu ta carga Hesus den su curason nunca por keda indiferente. Nos no por reserva Hesus pa nos so.
Hesus ta inspira nos pa ta habri pa otro, comparti cu otro y sirbie den loke ta na nos alcanse.
Encuentro di Maria y Elisabet na mesun tempo ta e prome encuentro di Hesus y Huan. Huan ta reacciona na
presencia di Hesus. E ta ‘bula di legria’.

E escena aki mester ta un tema di reflexion pa tur mama cu a comete aborto of ta haya tentacion pa atenta contra
bida di e yiu cu e ta carga den su barica. Caso di Maria y Elisabet na estado ta confirma cu fo’i concepcion cada
criatura mester ta trata como ser humano. Maria y Elisabet no por contene alegria di tene un yiu. Nan ta consciente

cu e yiunan aki ta un regalo di Dios.

Maria ta hiba Dios pa Elisabet y ta experencia presencia di Dios den Elisabet. Si nos ta trata otro cu amor di Dios,
sin duda nos lo ricibi amor di Dios fo’i otro. Presencia di Dios den bida di Maria y Elisabet ta haci nan papia palabra
di Dios. Nan goso y alegria ta keda expresa den nan oracion di alabansa y gradicimento. Den Magnificat.

En cuanto nos ta consciente di presencia y obra di Dios den nos bida nos tambe lo canta nos magnificat. Dios ta
haci cosnan grandi den nos bida en cuanto nos sa obedec’E y cu tur confiansa y den tur circunstancia nos sa bisa
Dios nos “SI”.

ORACION

Señor ! Bo boluntad sea asina na tera como na shelo !

PROPOSITO

Haci un bishita na un mama cu ta na estado.

Pone atencion pa tur bo bishita na otro sea bishitanan caminda na prome luga bo ta bay cu Dios pa comparti Dios cu otro.