Page 8 - ENNIA OCT 20, 2015

Door di falta control di antes tabatin casi 6 mil persona
manehando sin rijbewijs valido

Publication: Tuesday, 20 October 2015. Categoria: General

Minister Dowers a participa den seminario di ENNIA riba siguridad den trafico

ORANJESTAD (AAN): Siman pasa a tuma
luga den Renaissance Convention Center e di dos edicion di Prevent Now di ENNIA Aruba,
durante cual e evento aki a mustra riba con e ciudadanonan mes por contribui na prevencion di
un gran cantidad di delito.

Na e ocasion aki Minister di Husticia, mr. Arthur Dowers, a worde invita pa dirigi su mes na e
participante durante e apertura di e evento. “Na momento cu mi a asumi e posicion di Minister na
2009, un di e aspectonan cu tabata hopi importante den maneho di husticia, pami tabata siguridad
di trafico.” Siendo un persona cu ta bini di sector Salubridad Publico, e mandatario a splica cu e
ta hopi consciente di e consecuencianan di kico un trafico insigur por nifica den un pais chikito
manera Aruba.

E cifranan, el a bisa, ora di compara nan cu otro pais no ta bisa suficiente, pero e cifranan cu
tabatin na 2009 ora, ora cu el a asumi e puesto di Minister di Husticia, “mi tabata haya nan
espantoso. E aña ey nos tabatin un cantidad di 21 accidente cu consecuencianan fatal y nos meta
tabata pa traha duro y reduci e riesgo aki”, e mandatario a señala. Hopi hende, el a agrega, no ta
consciente di e daño cu un accidente ta causa na e victima, na doño di trabao y comunidad en
general. Pesey semper, e mandatario a bisa, e tabata kier pa siguridad den trafico ta prioridad den
maneho total di husticia. Esaki tabata motibo cu a pone pa centralisa e Departamento di Trafico,
a hacie un prioridad. “Mi ta kere cu e por ta miho, cu nos tin mas trabao pa haci,” e Minister a
expresa.

E decision ariba menciona a trece cune cu a mira un aumento di casi 200% den procesverbaalnan
den trafico. Esaki tin como consecuencia cu e chauffeurnan ta mas consciente riba e riesgonan
den trafico. “Den mi pensamento tin tres aspecto importante ora cu ta papia di trafico. Bo tin e
infrastructura, cu por influencia e riesgonan cu ta core den trafico (Polis y DOW ta hunga un rol
den esaki); bo tin e ley (Ministerio di Husticia y Polis ta hunga un rol aki); y comportacion di
ciudadanonan den trafico.”