Page 9 - TTC 9 JULY 2015

AWEMainta Diahuebs, 9 Juli 2015 13

Delegadonan di mas di 26
diferente pais presente riba nos isla

Caribbean Plant Health
Directors ta cla pa traha

riba plan di accion

na bienestar di nos matanan

DELEGADONAN di Departamento di Agricultura di

mas cu 26 pais ta na Aruba pa participa na un foro cu
ta hiba e nomber di Caribbean Plant Health Directors.
Diamars mainta a tuma lugar e apertura oficial unda
Minister Otmar Oduber a hiba palabra.
E mandatario a inicia splicando con facil e ta awendia pa
nos yega na destinacionan rond mundo tanto via avion
como tambe via laman.

Esaki no ta conta solamente pa hende, pero e ta demostra
tambe con facil e ta, pa ricibi bishitanan indesea manera
un invasion di bestia cu lo tin su consecuencianan
devastador pa nos naturalesa.

Un ehempel cu ainda ta fresco den nos memoria t’e
invasion di e Red Palm Weevil, unda por medio di atende
e Caribbean Plant Health Directors na 2009 na Guyana,
nos a logra di haya ayudo pa combati esaki.
Santa Rosa mesora a manda un prueba pa laboratorionan
di United States Department of Agriculture.
Despues di ricibi un confirmacion mesora un equipo
tecnico a bin Aruba. A instala 6 trampa den e matanan
den e area hotelero unda pa februari 2014 a conclui e
proyecto cu 21 trampa.

Mayoria hotel a tuma e medidanan necesario y no
tabata kier e tipo di palma aki mas riba nan propiedad.
Manera cualkier isla chikito pa instala un regulacion di
un tratamento fitosanitario, no ta facil.
Aunke tin un control severo ainda e Red Palm Weevil ta
riba nos isla. Locual ta mas alarmante ta, cu un invasion
chikito por tin un impacto economico grandi pa nos isla
mirando cu Aruba ta depende di e industra turistico.

Minister Oduber ta bisa: “Nos ta conciente cu invasion
asina aki por tin consecuencianan grandi riba nos
biodiversidad chikito y nos ecosystema.
Pesey ta importante pa nos continua di establece un
regulacion pa un tratamento fitosanitario. Formando
parti di Caribbean Plant Health Directors Forum, sigur
ta yuda den e aspecto aki.”

Minister a termina bisando cu e ta agradecido cu
Caribbean Plant Health Directors a scoge Aruba como
anfitron e aña aki, y a desea tur e participantenan un
foro fructifero pa yega na plan di accion aplicabel na
bienestar di nos matanan.