Page 59 - flip minvos

Eerste Hulp a nenga di yuda pacient cu sangramento y cu ainda ta sigui sangra
na cas!

Publication: Thursday, 26 March 2015. Categoria: General

ORANJESTAD (AAN) – For di diez dia atras, un ciudadano a bay Eerste Hulp, cu un
sangramento formal cu por ta debi na un ambei, of otro situacion cu por ta serio.

Na Eerste Hulp nan no a dune ningun ayudo, ni sikiera un chekeo visual, y mesora a bise cu e tin
cu bay su docter di cas. For di nan punto di bista esey no ta un emergencia, mientras cu no
mester ta docter pa sa cu tur sorto di sangramento profuso y cu no ta stop, mester wordo analiza
medicamente y cu tur atencion y seriedad.

E docter di cas a dune un receta mientras tanto e haya cita cu un specialista. E docter di cas mes a
keda straña cu Eerste Hulp no a yuda e pacient aki.

E remedi cu e persona a haya di e docter no ta yude pero el a sigui sangra y ketobay e situacion a
keda mesun cos.

El a haya cita cu un gastroenterologo cu a bin nobo na Aruba cu a habri un lugar pe (ya cu e
tambe tin lista di spera) pa final di April. E gastroenterologo a laga e pacient sa cu Eerste Hulp
mester a mira su caso y yama e specialista, pa dicidi si e ta lague interna, pasobra e sangramento
ta hopi, y mester di e testnan necesario pa saca afo kico exactamente ta causando e problema.

Matutino DIARIO a combersa cu e casa di e pacient, ken logicamente ta sumamente preocupa y
cu yen di ansiedad pa e dia di e cita yega pa al fin su ser keri por haya alivio pa su salud.

Esaki ta un di e tantisimo keho cu tin riba e sistema di traha di Eerste Hulp, vooral door di e
personal no Arubiano. No ta bon pa generaliza pasobra tin hende si ta topa cu bon suerte di
wordo atendi y yuda pa un of otro docter y veerpleegster di afo, cu ta compronde e situacion y ta
purba haci lo mihor, pero lamentablemente esakinan ta un minoria! NO ta por nada cu tanto
hende asina tin hasta miedo di bay Eerste Hulp cu cualkier problema di salud cu nan sinti cu por
ta algo serio, pasobra e mentalidad cu nan ta bay topa cune, ta practicamente “mihor nos ta laga
bo muri”!!! Asina e famia di e pacient ta sinti su mes door di e experiencia fastioso y delicado
aki.

http://www.diario.aw/2015/03/eerste-hulp-a-nenga-di-yuda-pacient-cu-sangramento-y-cu-ainda-ta-
sigui-sangra-na-cas/